日本人妻追星之瘋狂早已全球皆知，韓星裴勇俊當年幾被扯爛衫褲咁滯。如今呢班正值虎狼之年嘅群體，將矛頭指向乒乓美少女福原愛同網壇新星錦織圭，勢要好似拆抽油煙機咁，拆散呢對體壇鴛鴦。
日本人妻怒氣衝天
日本雜誌《Friday》本月20日踢爆愛‧錦織鈦戀，公開兩人拖手漫步東京街頭嘅相片。這班師奶朝早出街買餸睇到本雜誌，隨即好似金融海嘯咁，傳遍街市、超市、麻雀館；冇耐佢哋打爆日本網總嘅電話，要求小愛離開小圭，以免影響男方事業，「否則咪怪我哋做出過激行為！」
又難怪班人妻咁火滾，原來福原愛父母04年離婚，之後66歲嘅爸爸福田武彥被指假離婚，仲涉不動產欺詐行為，目前兩父女同媽媽間屋更相距不過兩米。所以，班人妻咁群情洶湧係有理由嘅，雖然小愛喺呢次風波係無辜者，不過要追星人妻客觀理性，似乎過分苛求啦！
不過，愛‧錦織鈦戀冇咁易散。20歲嘅小愛靠乒乓球板走天涯，18歲嘅小圭更係網壇新晉。小愛形容對方：「短髮、高大，理想嘅類型。」小圭就讚對方係「優秀、單純的女性。」咁情投意合打風都打唔甩，我求大俠反而擔心父母反對，好似嘉亨戀排除萬難先開花結果就慘啦!?
兩家世交情投意合
唔怕，原來福原、錦織兩家係世交，兩位爸爸既係舊相識，小圭仲就讀於小愛嘅母校青森縣高中㖭！福原生回應阿女戀情時話：「咁唔係好值得欣慰咩？希望佢哋互勉打好波啦！」52歲嘅錦織清志（小圭爸爸）就話：「同人交往對年輕人係好事嚟嘅！」
係咯，既然兩位世伯都唔介意，人妻們不如祝福吓呢對情侶，放下鍋鏟，拎起球拍去打波好過啦！