泰國示威者攻佔曼谷機場，大班香港人滯留當地，包括關注性工作者組織「紫藤」同一班姐姐仔。佢哋一行14人過泰國交流，原定星期三返港，點知遇上封機場，到噚日聽到話有國泰包機嚟接香港人，嗱嗱臨走去曼谷嘅國泰辦事處買飛，點知對方根本唔受理，入境處又一味耍官腔，搞到紫藤幹事同班姐姐仔嬲到爆。
滯留曼谷冇機返港
紫藤今次衝出香港，帶隊過曼谷，主要同嗰邊協助性工作者嘅團體交流組織心得。同行嘅除咗組織幹事仲有幾個性工作者，佢哋近年都好積極，希望組織起嚟捍衞自己嘅權益。誰知交流之行變咗滯留之旅，原定去幾日，星期三就搭泰航返香港，點知到噚日仍然無歸期。
紫藤噚日聽到當局話有國泰包機飛去芭堤雅軍用機場，除咗接載有國泰機票嘅旅客，仲會以每位1,100蚊嘅價錢，賣飛畀其他旅客，佢哋即刻通知滯留當地嘅幹事Elaine。Elaine即時撲去國泰喺曼谷嘅辦事處，諗住買飛，點知當地嘅國泰職員話「冇咁嘅安排」，根本就連資料都唔肯畀佢哋留低等後補。
據Elaine了解，現場前前後後有近百人，都係想買飛返香港嘅非國泰旅客，包括身上只餘2,000泰銖嘅一對夫婦，同幾十位郵輪團長者，各人都非常徬徨。紫藤話，曾經打過入境處個熱線電話，但對方只係一句「我哋會安排㗎嘞！」咁就收線。後來經傳媒轉介，入境處人員打過畀Elaine，但都只係話政府好難干預航空公司嘅商業運作。
搵議員向政府求助
求助無門，紫藤連立法會議員都聯絡埋，找上長毛同毓民。毓民嘅助理搵過保安局局長李少光，希望政府向航空公司施壓，增加包機航班，疏導旅客。但李少光正在外訪，入境處就答應會要求國泰考慮增加航班，但就強調始終要由國泰決定。
搞咗一大輪，都係得個桔。人哋澳門政府已經話會租用包機免費接載啲旅行團旅客返歸，態度點都積極過香港政府。
mailto:[email protected]