放眼祖國返內地發展，先要跟同胞打好關係，咪以為識講普通話就掂喎，點解？人哋話你係「香餑餑」（音撥），你識唔識反應先？住酒店有「叫床」服務，你又會唔會諗錯隔籬？亞姐們識，你又識唔識內地潮語？
記者：周靜雯
攝影：周旭文
解畫
白骨精：唔係孫悟空對付嗰隻妖精，「白骨精」係「白領、骨幹、精英」三字嘅結合，做白領都唔夠勁，仲要係管理白領嘅精英份子，即係一人之下萬人之上嘅高層囉。
高級灰：返Office工對衣着好講究，上班族要着老西，靚靚仔仔咁見客，又咁蹺呢班人偏好灰色，灰色呢種身份象徵，演變成用嚟形容鍾意住城市、懂得享受生活嘅專業人士。
Office潮語
即係咁，北上同大陸同胞們共事，好多時都要坐辦公室開會，入正題之前，又少不免要斟茶灌水吹吓水。吹水，又點可以唔識番三兩個Office常用潮語？我唔識，無資格教你，搵幾位來自五湖四海嘅亞洲小姐教教大家，學識中國潮語，包保唔會雞同鴨講。
解畫
立馬：大陸人真係乜都簡，簡化咗筆畫嘅簡體字都嫌未夠簡，仲要簡化埋詞語變潮語，不得不佩服佢哋咁有創意。「立馬」係「立即」、「馬上」嘅混合體，簡得嚟好有高登Feel，不過我想問，點解唔叫「即上」或者「即馬」呢──呵？
跑街小姐：日日喺街跑嚟跑去討飯吃嘅，除咗Sell乜Sell物嘅傳銷員，當然仲有保險經紀啦，同胞叫保險經紀做「跑街先生」或「跑街小姐」，指佢哋會喺街頭巷尾介紹保險產品等，又真係好形象化喎。
關係戶：相信睇字面都應該估到係乜，無錯，即係靠人事關係上位或得到利益嘅人，亦等於我哋所講嘅黃馬褂囉，呢類人唔可以得罪，得罪「關係戶」注定無運行，大家要醒目嘞。
侃大山：北京土話，「侃」係「砍」嘅普通話諧音，所以有人會寫成「砍大山」，意思指有人揚言用一把刀，又就可以砍斷大山，聽完都知唔得啦，即係吹水咁解囉，而吹水唔抹嘴一族，會被稱為「侃爺」或「侃姐兒」。
放冷風：唔係講是非篤背脊咁簡單，係比講是非更嚴重嘅無中生有，即係散佈流言。嘩，有做過都話俾你唱呀，無做過就俾人唱，咪即係老屈？老屈人唔係幾好喎，出嚟做事有品啲好。
紅燈族：好多人估意思係小器同事，其實係指打小報告、篤背脊嘅人。佢哋好可能係啲唔起眼嘅人，但年資就比你多，經歷風浪比你多，捉你錯處就話都無咁易，正所謂寧得罪君子，莫得罪小人，紅燈一族，都係擰歪面當睇佢唔到，大家無瓜無葛好啲咯。
軟肋：指肋骨，軟肋擴張可以幫助呼吸，「軟肋」呢個位好怕被攻擊，唔覺意撞到枱角，都會痛到飛天，慢慢引申指某人或某事嘅弱點、要害或死穴所在。
沙龍活動：大家咪誤會，唔關影相事，係研討會咁解，「沙龍」係英文Salon譯音，即係客廳。原來十八世紀嗰陣嘅法國人，最鍾意喺客廳聚會，傾時事講文學，天南地北無所不談，直到𠵱家，同胞仲會用「沙龍活動」去形容有關時事、文學等嘅研討會。
漏網潮語
潮語點止咁少，仲有大把㖭呀，參考康照祥著《兩岸詞語即時通─120句必懂流行話語》（$70/PageOne），發覺大陸潮語真係幾好笑，得閒問吓身邊朋友識唔識，好過問埋啲低能IQ題搞爛Gag。
亞姐識唔識？
咁啱見到班來自國內嘅亞姐，當然唔會放過機會，即刻考吓佢哋對內地潮語嘅認識。咦！班佳麗都幾潮喎，都答啱好多題㗎。
1.白骨精=白領、骨幹、精英
2.高級灰=專業人士
3.跑街先生=保險經紀
4.紅燈族=鍾意篤背脊嘅人
5.沙龍活動=研討會
6.放冷風=散佈流言
7.大款=有錢佬
8.貓膩=不可告人嘅秘密
9.侃大山=吹水
10.空的=空運客機
趙楊（來自湖北）
答啱7題
「其實大部份都知道，但『紅燈族』就不知道了，哈，原來是打小報告的人！其實依字面解釋，很多潮語應該很易猜對吧。」
李菲（來自遼寧）
答啱6題
「『跑街先生』？是保險經紀嘛，我有聽過，『大款』、『侃大山』也很常用，一定要懂。」
沈函芳（來自遼寧）
答啱5題
「其實很多都聽過，例如『白骨精』、『沙龍活動』等，我在內地經常聽到。」
王譽霖（來自雲南）
答啱5題
「『紅燈族』不是深夜出動蒲吧玩樂的人嗎？『貓膩』都有聽過，通常指內幕消息。」
王婭欣（來自河北）
答啱4題
「有些真的沒聽過，但我懂得甚麼是『侃大山』，因為內地人常常會說的。」
陳莎（來自江西）
答啱3題
「很多都不懂，沒聽過，在內地，很多人會說『白骨精』、『大款』。」
