人有相似，物有相同，人人都有眼耳口鼻，學側田《好人》歌詞話齋：「平凡像我，路過十個似我。」似樣真係一啲都唔出奇。娛樂圈型男索女雲集，好多人都好似同一個模鑄出嚟，今日玩遊戲，以下有13幅明星藝人合成相，你又認得出幾多個？
記者：王震遠
1
貼士
‧今年拍代表作《烈火雄心》第三集，傳與鄭嘉穎鬧不和，早前更同無綫提前解約。
‧日本足球界國寶，29歲掛靴赴英讀書兼從商，𠵱家經常喺名流界蒲頭，又或者踢吓慈善賽。
2
貼士
‧最近演性格古怪物理教授，令香港多咗班潮童擺出佢招牌動作，完全擺脫當年二佬形象。
‧靠《第一誡》成為出爐韓國富川電影節影帝，做慣南哥做過大俠霍元甲，最近密謀再戰樂壇開演唱會。
3
貼士
‧經常喺無綫電視劇集飾演師奶角色，早排佢個仔疑被上司打爆鼻骨，搞到鬧上法庭。
‧跟家姐舊路做歌手，行跳舞Rock女路線，可惜反應一般，同家姐打對台做瘦身代言人。
4
貼士
‧前Cookies成員，後來改名兼組Band做PingPung主音，一曲《逼得太緊》橫掃上年頒獎典禮。
‧當年一吻咀王子，引嚟一班觀眾指摘投訴；今日喺畢打街飾演開心少女，被人狠批演技浮誇。
5
貼士
‧靚仔、有台型、唱得跳得，Soler孖生兄弟之一，係大佬定細佬？自己估。
‧亞視台柱，《百萬富翁》節目主持，好多女仔都讚佢着西裝好好睇。
6
貼士
‧香港當紅饒舌組合成員之一，喺《內衣少女》入面飾演CY，啱啱有新派台歌《富甲天下》。
‧喺金牌淪為行過寵物，歌藝不俗，上年仲係Paco力撐新人之一，今年靠拍電影Keep住曝光率。
7
貼士
‧過氣球壇天之驕子，可惜自己唔爭氣，爛蒲爛滾搞笑到滾着件人妖，有排都收唔到條水桶腰。
‧本為上市公司CEO，用自己嘜頭出公仔唱廣告歌，「愛司機摸案」令佢人氣大跌，請辭唔Do。
8
貼士
‧做Model拍廣告出身，上年開始轉戰樂壇出唱片，同鄭融合唱K歌《一事無成》，熱爆K場。
‧曾經係歌手近年主攻電影，被人稱「票房毒藥」，最近同伊健雙雙稱影帝。
9
貼士
‧做訪問語出驚人被封「金句王」，啱啱同光良、衞蘭完成慈善音樂會。
‧年頭重操故業再投資眼鏡店，邊拍劇邊做老闆，《學警雄心》突然翻生，唔做阿Sir做江湖大佬。
10
貼士
‧中國女子跳水隊領軍人物，奧運攞完金牌後收山，盛傳與霍啓剛拍拖四年，時常傳出婚訊。
‧有線娛樂台《怪談》主持人，前排親身上陣主演大膽題材「屍前死後」，令佢聲名大噪。
11
貼士
‧被台灣傳媒稱為氣質美女，同周杰倫合演《不能說的秘密》走紅，其間更與周董傳出緋聞。
‧有的骰桂綸鎂之稱，啱啱奪得香港小姐季軍兼最上鏡小姐，但國際小姐競選大賽12強不入。
12
貼士
‧無綫當紅花旦，喺《家好月圓》裏面為情所困，幾乎集集都要喊，今年簽約唱片公司。
‧飛輪海成員之一，外號「汶萊王子」，靠美男子外貌上位，喺《籃球火》裏面飾演無極尊。
13
貼士
‧涉及藝人裸照事件，大半年無開工，經常盛傳復工，客串演出《梅蘭芳》戲份全部被刪。
‧經歷緋聞洗禮，上月重整旗鼓推出新唱片，夥拍趙碩之拍攝青春偶像劇，飾演酒吧拳手。
分析
估中10~13對
恭喜你！你聯想力相當強，身邊朋友都應該畀你話過似邊個似邊個。行街，你會發現一啲本來平凡嘅事，幻想後會自己偷笑，但其他人完全唔明你有乜好笑。得你一個人開心係好自私，不如同朋友分享吓你嘅笑料。
估中5~9對
你觀察力同聯想力唔算高，好難聯想到兩件唔同事物有乜關係而啓發笑料，人生會少咗好多樂趣。同你講小泉純一郎好似IQ博士入面個馬斯特博士，你都唔識得笑，不妨平日望多啲白雲，想像吓佢似羊定牛，聯想力好快就會返番嚟。
估中0~4對
一係你聯想力太小，一係你記性唔夠。聯想力唔夠因為你想法太保守，咁搞法真係唧都唔識笑，凡事畀多啲聯想，咁就幾無聊嘅嘢都諗到笑位，乜嘢都可以笑餐飽。如果你記性唔夠好，認完人幾秒後就唔記得，換個角度睇都係好事，唔開心嘢好快忘記得一亁二淨。
答案
變臉「人造人」
真係唔可以睇小網友嘅創造能力，事關佢哋經常做出一啲令人笑爆嘴嘅合成相，今次呢對受害者就係經常俾網友揶揄激似度99%，可惜性別不同嘅鍾嘉欣同吳尊，慘將吳尊個樣Key落鍾嘉欣塊面度，結果又真係幾Match，呢勻真係惡搞啦。
（ http://www.hkbbs.biz/thread-55995-1-1.html）
網友真人Show
讀書年代，好興無聊幫身邊同學仔改花名，甚麼翻版伊健、樣衰版黎明一應俱全，網友都鍾意咁玩，更搜羅一堆疑似藝人照片放上網任人瀏覽，當中有幾個真係似模似樣，行出街分分鐘會認錯。
（ http://jkforum.net/thread-45413-1-1.html）
