花旗銀行與花旗集團需要美國政府打救，緊急注資二百億美元及擔保三千零六十億美元不良資產，左丁山聞之，唏噓不已。想當年，與一班同學考萬國寶通銀行，時稱FirstNationalCityBank，簡稱FNCB做trainee，一位同學因講英文唔夠好，畀人質疑：「乜你讀完大學，英文講得咁唔好？」同學面紅耳熱之餘，一時惱怒，講番廣東話與對方爭辯，對方講粵語當然唔夠斤両啦。同學以為出番一啖氣，點知以後個幾月，我哋成班人都收唔到FNCB嘅通知，即係肥晒佬啦。大學就業輔導處不明所以，打電話去問吓，FNCB回覆話：「你哋班畢業生好冇禮貌，我哋唔請。」輔導處主任大驚，猛咁游說，好似隔多一兩年之後，FNCB先至下到啖氣。
昔日之FNCB，即今日之花旗，十分巴閉，入到去者，多係校友之中英文talk得、牙尖嘴利之醒目仔女輩，加上係工作狂，能夠捱得特長工作時間。一位MBA朋友入咗去之後，對左丁山講：「FNCB嘅訓練特佳，但每個位都有兩個人做，爭上位競爭激烈，隨時受淘汰，冇得留低。」故此能夠長期留低如阿松哥者，必屬精英，公認叻仔。頂唔住外流者，亦屬精品，例如，印尼、菲律賓金融財經界高層之中，就有好多花旗校友。
但一間咁有傳統，咁多人才嘅銀行，點會搞到今時今日咁嘅死火狗狀況呀，真係難明白。據報花旗銀行與TravelersGroup合併後，收咗所羅門美邦（投資銀行與證券行），大力爭取華爾街投資銀行生意，買賣巨額CDO、CDS衍生產品，忘記咗風險所在，陷入黑洞之中。前行政總裁普林斯冇有識死，去年七月接受《金融時報》訪問時，仲大言不慚咁講：「做銀行就要參加派對，音樂停止時，先至坐低。但現在音樂未停噃，我哋繼續跳舞！」做當今世界第一大銀行嘅總裁，普林斯居然唔知次按債券風暴已掛起風球，豈止隔江猶唱後庭花咁可憐。律師出身之人做銀行總裁，睇唔通世界經濟大勢，始終差一啲。以前Y公子在財經界叱咤風雲之時，曾對左丁山講：「我唔喜歡請律師或會計師做ibanker，請佢哋做法律顧問或核數師就差唔多！」佢曾在Citi做過，今日見花旗如此，不勝感嘆。