《珠光寶氣》中的關禮傑（Eddie），性格神神化化，逼舊女友墮胎棄舊貪新。但現實中的他超錫兩個囡囡，當然不會顧此失彼，只是大女兒踏入青春反叛期，思想行為可能會有很大改變，不過Eddie還是不大擔心，因為只要他面無表情，囡囡就知他在發火，不會曳曳。最大問題反而是容易受傷的大女過份感性，明明苦情片他都惟有大笑，以安撫女兒的眼淚……
記者：林佩婷
攝影：林栢鈞
場地：麗豪酒店SceneBar（21321231）
反叛青春 理性教女
關禮傑大女楓馨已經13歲，正正踏入青春期，亭亭玉立快要與媽媽平頭。平常的青春期男女都較叛逆，追求獨立、疏遠父母，猶幸，Eddie話個女反叛極都有個譜，但有時都會經常問點解。「小朋友大個啲鍾意同朋友一齊多過跟家人，有時我哋想一家去飲茶、行街或者睇戲，佢就會問點解唔可以同朋友去街，點解咁樣唔得。我會同佢講應該珍惜同家人相處時間，好似我父母長年喺加拿大，所以我特別珍惜見到父母嘅日子。而且始終年紀細，單獨出街父母會擔心。如果佢成日發脾氣，我就會話咁做會好傷父母嘅心。」
咪開口就鬧
通常父親給人的感覺都是絕對權威，但Eddie話任何事都要了解清楚才會下結論，不能一味鬧。「囡囡都會有自己嘅意見，有時覺得佢做錯咗，都唔可以一味話佢，鬧都要鬧得有技巧，否則你一開口就鬧，佢根本唔會同你講發生咩事，應該等佢話你知來龍去脈之後再解決。好似囡囡前排唔見咗銀包，太太好緊張係咁問點解唔見，又話報警咁。我知道後就話唔好追問住，先報失，因為唔見咗銀包已成定局，追究都無用，惟有慢慢解釋第時要小心啲。」
了解女兒朋友
踏入青春期，除了讀書，另一個常見的問題就是男女關係，但傑仔夫婦絕無擔心。「與其經常問佢同咩朋友出去玩，倒不如請晒佢啲朋友返嚟一齊玩。我太太就常請同學仔BBQ。至於男女感情，我哋唔介意佢有男性朋友，始終女仔由媽咪負責解釋比較好。我就會用佢鍾意嘅偶像做例，教佢最緊要識得分析對錯。」
喊片大笑教女堅強
總括而言，只要Eddie面無表情，囡囡就已經知道爹哋嬲緊，不會亂來。Eddie最擔心反而是她太感性，容易受到傷害。「好似有時睇戲，大家明明覺得套戲唔算感人，佢都喊得好厲害。所以我有時睇卡通，見到啲感人場面，我會特登大聲笑，然後解釋畀囡囡知只係卡通，唔係真實唔好喊，希望等佢哋更堅強。」
關氏家訓：
鋼琴必學
一．Eddie認為鋼琴是所有音樂的開始，能啓發右腦的感情世界、提升品味，所以堅持兩個女都要學。
二．堅持運動。「做藝人有起有落，我習慣用運動保持自信，我會話跑步個人會靚啲，鼓勵佢哋跑步。𠵱家大女都會同同學去打波或攀石，希望令佢由感性變得更理性自信。」
三．電影電視全看英文台，又選讀國際學校，背後還有個理念：令孩子擁有快樂童年免受考試壓力。