中東老細：喂！老麥！咁夜仲唔瞓？我頭先同班主蒙生chat完，佢有睇3:0大勝阿仙奴場波，話好精采，仲吩咐我同你講放膽啲，需要買咩人即管開聲，錢唔係問題。
老麥：多謝老細！上次喺阿布扎比經閣下及蒙生指點，突然間好似開咗竅，半夜三更都high到瞓唔着，滿腦子都係戰術圖、球星人頭，我一定會做好呢份工嘅！
中東老細：我哋一直都冇懷疑你嘅能力，今季目標好簡單——爭取歐聯參賽資格！我覺得門將位置要加強，1月可能用5,000萬鎊羅致保方，你點睇？
老麥：好，買到佢梗係好啦！不過，車路士後衞布歷治進展如何？
中東老細：老麥！我知你好想買布歷治，不過阿巴講到明唔會賣。而且，蒙生想將曼城打造成球壇嘅人工棕櫚島，好需要世界級球星助陣，咁先夠閃、夠威嘛！
老麥：我明白，不過後防始終有隱憂，現時好後衞又難搵。
中東老細：有錢就唔難啦！我打算引入 泰利，出價6,000萬鎊，周薪20萬鎊；艾殊利高爾，2,000萬鎊。阿巴𠵱家做咗股市大閘蟹，唔會嫌錢腥嘅。
老麥：泰利呀？呢條友當年起摩連奴尾注，我驚佢搞到曼城立立亂，你都知巴西幫已經唔多聽話啦！不如買阿仙奴嘅高路托尼呀！？
中東老細：又得！阿仙奴財政狀況仲差，我哋一於用錢大佢哋。
老麥：係當然好啦！但之前你同鄉阿法希姆話要買卡卡、C朗，之後冇下文，今次……
中東老細：我又點同佢呢？我一向都牙齒當金使，你唔係唔信我呀？係你就早啲唞啦！
老麥：我絕對唔係咁嘅意思，咁我一於1月等佢哋加盟啦！時候都唔早，早唞啦！886