謝霆鋒與父親謝賢前晚一同出席電影《証人》首映禮，二人作父子裝打扮襯到絕，和四哥如餅印的霆鋒透露，不少片商睇中父子兵上場，並有3位導演不約而同力邀拍《新難兄難弟》，霆鋒坦言與老竇合作是心願，不過謝賢則笑言要睇錢份上才夠誠意。
電影《証人》前晚在尖沙嘴海運戲院舉行首映禮，主角謝霆鋒、張家輝、張靜初等均有出席，到來捧場的有謝賢、關詠荷、蔡少芬與丈夫張晉、歐陽震華、宣萱、林保怡及何超儀等。霆鋒雖未有太太栢芝來撐場，不過換來的是老竇謝賢（四哥）捧場，他們以父子裝出現，不過四哥卻認為用兄弟裝較貼切。
終擺脫父親影子
有指不少片商邀父子二人合作拍戲，霆鋒承認說：「籌備中啦，好多人搵我哋拍，要睇爸爸點，以前我好想脫離做爸爸嘅影子，不過我咁諗好儍，我應該引以為榮，不過𠵱家我終於踏出咗，啲人會叫霆鋒個老竇，唔係謝賢個仔，爸爸年紀大，我𠵱家有個心願係同佢合作，拍MV都可以。」霆鋒又取笑四哥好戲又長氣，又扮四哥插袋擺甫士並說：「有3個導演搵我哋合作拍《新難兄難弟》。」
四哥也同樣希望能有機會與兒子合作，四哥說：「合作睇出幾多錢，睇吓誠意點先。」記者笑問他是否要求戲中如大情聖般女友滿天下，四哥笑說：「我不知幾專一，啲戲做到我似花花公子啫，我啲感情冇試過唔好。」一向口花花的四哥在遠處一見趙世曾便對記者笑說：「呢啲就真正playboy，我只係假playboy。」不過當趙世曾與他打招呼後，四哥卻對趙世曾說記者指他是花花公子。
大會又為下月2日生日的張家輝慶祝，他表示今次是首次帶太太一齊出席首映，他甚麼也有故不用收生日禮物。問他可想過當影帝？他覺得有獎當然開心，但有人讚也開心。
栢芝主動提淫照
另外，霆鋒昨日接受商台查小欣訪問，問到老婆張栢芝涉入藝人淫照事件，霆鋒坦言栢芝有主動提過，但他卻沒有放在心上。查小欣問到若將來兒子向他問到此事會怎樣？霆鋒說：「吓，小朋友都識問起，佢有咁大影響力，咁我要裝支香畀佢。」
採訪：魯萍、林惠卿
攝影：陳俊強
