年尾將至，大家又開始幫啲富豪埋單計計身家排名，噚日輪到內地胡潤公佈「2008年胡潤IT富豪榜」，有靚仔CEO之稱嘅百度創辦人李彥宏，雖然身家由舊年180億元（人民幣．下同）縮水到今年嘅130億，但仍然屹立不倒蟬聯冠軍。
馬化騰輸蚊鬚排第二
至於舊年排行第三嘅中國ICQ之父、發明QQ嘅騰訊（700）創辦人馬化騰，今年升一級，以125億身家屈居第二；好彩小馬哥份人低調兼唔介意呢啲排名嘅嘢，否則一定㷫過火屎，事關如果以11月24號嘅股價計算，小馬哥其實應該排第一，爬番李生頭㗎！
計埋今次，已經係胡潤第6次發佈IT富豪榜，唔知係咪因為全球經濟差，今年上榜門檻由舊年13億，降低到11億，但比起第一屆嗰陣嘅1億，已經高咗好多，而入榜人數則仍然係50個。
至於呢個榜嘅「班底」，5年前李生、小馬哥都已經上榜，當年榜上有名嘅網易丁磊（今年排第3，身家有98億）、阿里巴巴（1688）嘅馬雲、搜孤張朝陽、同埋盛大嘅陳天橋家族等10位，基本上全部仲喺今年十大榜上「健在」！
喺環球金融海嘯之下，50位IT富豪總身家合共1563億，平均每人有31.3億，集體縮水13%。
新丁上榜今年有15人
至於新上榜嘅，今年有15人，當中以武漢凡谷嘅孟慶南家族最勁，以46億打入十大，排第九。
華華仲記得，呢個IT富豪榜當年真係幾吸引，尤其係對中港台女讀者嚟講，事關榜上好多鑽石王老五，𠵱家嘛，大家只需要睇，千祈唔好諗得太多囉。
李華華
mailto:[email protected]
2008胡潤IT富豪榜
第1位 李彥宏 身家：130億人民幣 公司：百度
第2位 馬化騰 身家：125億人民幣 公司：騰訊
第3位 丁磊 身家：98億人民幣 公司：網易
第4位 陳天橋家族 身家：85億人民幣 公司：盛大網絡
第5位 史玉柱 身家：81億人民幣 公司：巨人集團
第6位 王文京 身家：58億人民幣 公司：用友軟件
第7位 馬雲家族 身家：50億人民幣 公司：阿里巴巴
第8位 張朝陽 身家：48億人民幣 公司：搜狐
第9位 孟慶南家族 身家：46億人民幣 公司：武漢凡谷
第10位 張志東 身家：45億人民幣 公司：騰訊