星期六睇搵食報搵食版，發覺招聘廣告少咗好多，不單止比去年同期少，亦比幾個月前少，總之雷曼破產之後，花旗唔掂，渣打發新股大出血，世界金融市場陷入大災難！所有其他行業皆受影響，就業市場變成有裁員，無招聘。今天講甚麼市價，甚麼預測，都要以九月十五日以後嘅情況推論，任何人係要講九月中以前的平均數，都應該收聲。
星期六有一份幾高調嘅職位作公開招聘，就係「西九文化區管理局行政總監」。呢份工好唔易做，應聘之人應有心理準備，預先重溫肥佬黎當年為《蘋果日報》拍嘅廣告，就係成個背脊都中箭，自問背脊冇肥佬黎咁肥厚者，最好唔申請。
應徵者具備條件都幾多噃，（一）超過二十年高級管理工作經驗啦，擁有監督大型基建工程經驗更佳。前九鐵、現港鐵，或工務局嘅高官/總經理可以考慮申請。（二）深入透徹了解香港現況，並能夠理解藝術文化對香港的重要性。呢項或者只有藝術中心、藝發局高層或大學藝術教授可以及格。（三）擁有卓越策略規劃技巧和敏銳政治觸覺。不如就請即將完成任務嘅林煥光啦。（四）優良人際溝通技巧，具有國際及文化視野，呢項邊個有資格呢？好多人都可以話自己得嘅。
拆開四大條件，唔少人有資格，要四項俱備，認真頭痛，左丁山諗咗一排，發覺港大建築系龍炳頤教授最有條件，但龍教授會唔會或肯唔肯食呢一碗熱飯呀？有幾多斗米先？原來話明申請者現時年薪約一百五十萬元者方可申請，有政治助理嘅薪水，就有資格，即係暗示，呢份西九行政總監嘅年薪不會少於百五萬，香港大把人有資格申請。左丁山本以為呢份工最少應有四百萬元年薪再加退休、醫療福利等等，否則難以請到真正合乎要求嘅人，困難在於文化人唔識大型基建工程管理，工程師未必識得文化藝術，不如就索性請一位如林煥光之類嘅前高官，下面再聘請工程總監輔助之！呢個職位如由工程專業人士擔任，會容易碰上政治災難。諗多啲，西九文化區管理局不如三顧草廬，請林煥光走馬上任就算啦，費事諗咁多咯，如果好似聘請廣播處長咁費時失事，西九文化區之落成，遙遙無期。