𡃁模JaniceMan備受金融海嘯影響工作量，她要慳家縮減一半開支，炒股賺外快，更堅拒長期接濟男友。JaniceMan求財，郭羨妮則公開求偶，呼籲有錢有心人繼續追求。
𡃁模JaniceMan（文詠珊）、郭羨妮和施念慈，昨日在中環出席護膚品Zensation產品發佈會。JaniceMan近日曝光率不及其他𡃁模，她揚言受市況差影響，上月工作量大減一半，她說：「9月尾拍完電影，諗住開始接job，之前一個星期接到4、5個job，10月中至尾，一個星期得番兩個左右，啲客嘅budget少咗，但公司冇刻意減價，搵啲適合我嘅工作。」
月花至少二萬
問到是否收入減半？JaniceMan說：「比較幸運，10月加埋都OK，初時媽咪都好擔心，我除咗供保險、基金，慳慳哋每個月都要使兩萬元，𠵱家要再慳一半以上。」她謂不會叫仍在求學的男友資助生活費，但同樣不會貼錢男友，長貧難顧，她說：「唔會，我睇唔起呢啲男仔，可以互相幫助，但長遠唔可以囉，好彩近期投資有回報，放假喺屋企都會短炒股票搵外快，間中都會賺到幾千蚊。」
「有心人繼續追」
JaniceMan求財，「熟女」郭羨妮就求愛，她說：「希望大家唔好以為我拍緊拖，唔敢追我。」怕被斷米路？她說：「係呀，我冇時間拍拖，但希望有心人都繼續追我。」她初時謂對另一半沒甚麼條件要求，但之後都謂想找好心、健康、有愛心，問她可需有錢？郭羨妮不諱言：「有都無妨，上天安排囉！」
採訪：JessicaNgan
攝影：MatthewLam
