林熙蕾昨日由北京趕來港出席珠寶活動，她自爆投資基金勁蝕百多萬，密密賺錢，原來希望在美國買千萬元大屋，作退休用。林熙蕾又將緋聞男友朱孝天降格成朋友，更揚言想生BB，分分鐘做未婚媽媽。
林熙蕾昨日從北京趕來港，在九龍站圓方出席Bulgari新店開幕禮，品牌董事總經理JeromeBaudy見她即主動攬腰，她也禮貌地與主人家有傾有講，入店內參觀。
男士送珠寶叫好
佩戴了2,800萬元鑽飾的林熙蕾，單單手上重3.11卡的粉紅鑽石戒指，價值就超過2,200萬元，她說：「我好鍾意粉紅鑽石。」等人送？她說：「邊個會咁蠢送畀我，從來冇人送過珠寶畀我，只有讀書時有朋友送過銀器畀我。」是否想有男士送珠寶？她不諱言說：「唔介意呀，不過戒指就只接受老公送囉。」
提到全球經濟差，大部份人都投資損手，林熙蕾也不例外，她說：「我之前買咗基金好好，𠵱家跌咗百幾萬，係我辛苦賺嘅血汗錢，我𠵱家唔會買股票，改為買樓，想呢兩年內，喺美國買一幢200萬美金（約1,550萬港元）嘅house，留番退休住。」
林熙蕾現時正在北京拍攝葛優的獨立電影，聖誕才能返台灣休息，新年則會出外度歲，她說：「我都想搵啲時間拍拖。」問與朱孝天現時的感情如何？她說：「朋友囉，以後點就唔知。」她又忽然說想生兒育女，至於何時？她說：「順其自然啦。」問到朱孝天是否喜歡BB？她說：「唔知喎，我就麻麻哋，不過覺得自己應該有個仔囉。」
AmandaS.通淋巴減肥
此外，有份示範的名模AmandaStrang手上出現紅印及瘀痕，原來她通淋巴減肥，更要戒吃心愛朱古力至下月，她開心地說：「12月1日聖誕樹運到我屋企，就會開始佈置聖誕，我由細個一兩歲開始，就有傳統畫12月嘅日曆，每日食一粒朱古力，倒數到聖誕節。」
採訪：LawWaiMan
攝影：RickyIp
