昨日講及特區政府即使想干預市場，亦有心無力，因為政府根本缺乏干預機制，不比中台韓星政府也，大家見到政府高官最多出吓口術，例如講甚麼減薪一半，企業要顧社會責任，盡量不可裁員之類。呢啲說話講就好聽，實際作用全無，美國啲內閣官員從來少講，香港啲局長就明知冇用都要講幾句，交差性質啫。
呢日見到新聞話金管局助理總裁蔡耀君發信畀銀行，要求銀行體念時艱，不可輕言向有困難嘅中小企追還款（俗稱收遮），不禁同情蔡助理總裁，此時此刻坐佢個位，相當不易，蔡先生負責監管銀行，如銀行出事，佢就麻煩；銀行盤數，就係佢嘅部門檢查嘅，過往一概認真處理銀行呆壞賬，銀行如有呆賬（non-performingloans）而不撥備，一定會畀蔡先生嘅部門質疑。既然如此，在經濟不景時期，蔡先生應加緊檢查銀行嘅貸款質素，免生不測，先至啱波路。
誰知不然，蔡耀君竟然正式發信要求銀行唔好輕易追數，豈非與佢嘅職能任務相矛盾？碰啱呢日左丁山與成班老牌銀行家有中午飯局，呢個話題一起，前輩Ｈ立即拍案：「我自銀行退休已經二十幾年，咁耐都未見過銀行有呆賬而唔去追數嘅。有親呀？貪污呀？盲嘅唔識睇數呀？銀行管理第一要義係向存戶負責，第二係要向股東負責，借錢出門，見到有危險，焉可不追數！」現任銀行高層就講：「不怕官，最怕管，冇話同YKChoi抬槓嘅，總之我哋話收到知會，盡量配合便是，視乎情況而定。有呆壞賬而唔追數，講吓笑就得。」銀行唔追數？係一個政治決定，銀行董事會要有集體決定至得。打工仔，由低至高，一定層層上書，知無不言，說明邊啲貸款戶口有疑點，有風險，邊位上級夠膽批示：「遵蔡耀君囑，暫緩追討」？
不過蔡先生好識做官，發個通函，係表演畀立法會議員睇嘅啫，任志剛總裁在立法會講及放寬資本比率，讓銀行有空間放寬貸款，當然係同樣虛晃一招，以任總裁嘅智慧，佢豈會不知銀行正在加息與收緊貸款！