金融海嘯下，打工仔人人自危，連車仔老闆阿巴莫域治都嫌足球總監晏尼臣貨不對辦，想請佢消失咁話；我求大俠認為最應刨定《招職》嘅係布力般領隊恩斯，因為佢失職失到離晒譜！
講番周日布力般作客0:1負熱刺場波，瑞典後衞馬田奧臣開賽初段對住艾朗連儂已經立立亂，9分鐘犯埋錯造就柏夫里約真高射入奠勝球；之後恩斯仲唔即時換走馬田奧臣，結果39分鐘又侵犯艾朗連儂兩黃一紅出場（圖）。半場喺球員通道，火遮眼嘅恩斯仲同熱刺助教佐敦嗌交㖭！
落後下換走射手
前熱刺及錫周三領隊柏列特喺英國《衞報》嘅專欄，就從下半場戰術安排插恩斯，佢質疑點解半場用後衞丹尼森遜換走前鋒麥卡菲，雖然可以協助箝制艾朗連儂（上半場唔換？），不過鋒線得辛達告魯斯一個，更加冇機會追和。
目前布力般排尾2，近8場聯賽5負3和，恩斯呢次真係頭都大！不過呢位曼聯名宿冇得怨，因今夏親自買入羅賓遜、安祖斯、格拿等人，又無厘頭借咗智利中場維拉路華返嚟，結果14場聯賽入得14球失25球。最慘係上屆踢到識飛，喺聯賽入咗19球嘅辛達告魯斯份合約寫明，若1月份佢成功轉會而金額又多過1,800萬鎊，佢可以袋250萬鎊（約3,000千萬港元），唔怪得佢一心諗住轉會曼城，跟番前布力般領隊曉士，所以今屆聯賽淨係入得兩球！
簽「二打六」前鋒救亡
經濟環境唔好，老細嘅容忍度有限。咁恩斯有咩措施救亡？原來係買人！增兵絕對係最直接嘅方法，不過問題係買咩人！日前有報道指恩斯打算用350萬鎊，羅致今季入25球嘅薩爾斯堡紅牛前鋒贊高！奧地利聯賽點同英超比呀？恩斯因住多條失職罪，要去地鐵站搶《招職》噃！