呢排睇新聞有好多負面消息，大公司唔係裁員就結業，更有人炒燶股票激死老竇；唉！香港人最叻逆境自強，沙士都捱得過，呢次又點會怕海嘯。
講逆境自強，羅馬都可以話近期代表，自從11月頭主場擊敗車路士，就成隊波返晒嚟，打吡戰贏埋拉素，上仗又輕鬆大勝萊切，復出嘅隊長托廸腳風轉順，周三作客羅馬尼亞嘅克盧日，客W可以早捧。
克盧日主攻唔掂
大家或者擔心羅馬首循環主場已經輸畀克盧日，今次作客熱得過份，但羅馬主場1:2輸畀克盧日場波小弟都有睇，羅馬好早先開紀錄，之後就輕敵；當時克盧日仲係名不經傳，結果兩次突擊反勝，羅馬球員完場時望住分牌都唔係好信戰果會係咁。
不過時移世易，克盧日實力曝晒光，兩場遇上法甲嘅波爾多都輸波，目前得4分，今次主場贏唔到，下次對車路士更加九死一生，為咗些微出線希望，只好迫住要改變打法打主攻，咁就違反球隊本色；一於博羅馬周三本利歸還，博客W外，更冷敲埋羅馬淨勝兩球或以上，揀埋3.9倍「讓球主客和」「客勝」。
渾水摸魚過關除咗羅馬「客勝」外，就揀兩場歐協盃和波收場；其中巴黎聖日耳門上仗擊敗里昂，但從之前歐協分組賽嚟睇，只派二線兵出戰，桑坦德上仗分組賽都和到史浩克04，今仗和味濃。另外，AC米蘭剛剛聯賽失分，佢哋係歐協盃都以二線兵為主，主場嘅樸茨茅夫雖然歐洲賽經驗淺，但防守力唔差，有權博到一分，串埋呢口和波。
牽牛
周中早飛超級重心
星期三4
馬德里體育會勝（1.4）
馬體會上仗和波唔抵，今次主場定搵燕豪芬出氣，單W可追。
星期四4
熱刺勝（待定）
人旺冇幾何，熱刺由哈利列納執教，成隊波醒神晒，奈梅亨只屬荷蘭中下游級數，點擋？
星期四12
森多利亞勝（待定）
森多利亞主場威力強，爛仔前鋒卡斯辛奴又腳風順，史特加近況低迷兼換教練，作客更差到爆。
難啃早餐
星期三3
不來梅作客盲
安羅科薩斯已一再證明唔係魚腩，小島主場迫和國際米蘭，面對作客盲門嘅不來梅，有力保不敗。
〈早飛倉〉
主菜：星期三6羅馬勝（1.95）@1,600
渾水摸魚過關：星期三6羅馬勝[-1]（3.9）x星期四9巴黎聖日耳門和（待定）x星期四15樸茨茅夫和（待定）3x4@100
今日早餐價錢：-$2,000
上日賺蝕：-$1,300
早飛倉結餘：$94,034
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。