連續兩季攞咗西甲冠軍，皇馬今季仲有冇冠軍相？我求大俠睇到皇馬近仗嘅表現，真係唔敢講。雖然啱啱贏咗維爾瓦，但衰在有望逐漸取替魯爾嘅希古恩勇戰受傷；加上要長唞嘅雲尼斯達萊同洛賓等，皇馬前鋒「儲備」見底，可能迫住要重用黑仔嘅「野兔」沙維奧拿。唔怪得贏咗波，皇馬教練蘇斯達都十足啲買咗迷債嘅苦主咁苦口苦面！
講番上周六贏維爾瓦1:0場波，好在史奈達都算生性，整個世界波。之不過呢3分都算得來不易，仲要損兵折將，希古恩同史奈達賽後都加入傷兵行列！
我求大俠都睇好希古恩呢個後生仔，外形討好唔在講，最重要係埋門有貨交。家陣冇埋呢個𡃁仔，連埋長唞嘅雲佬同洛賓，皇馬前鋒得番一個漸見老態嘅魯爾，同埋一直懷才不遇嘅「野兔」沙維奧拿，呢鋪真係考起蘇斯達！
出沙維奧拿多輸波
同樣嚟自阿根廷嘅沙維奧拿，細細粒、有速度有技術，偏偏懷才不遇。喺巴塞坐後備席，嚟到皇馬，蘇斯達亦冇放佢喺眼內，淨係派佢去啲盃仔賽做吓配角，我求大俠都有啲戥呢隻兔仔唔抵！但係有樣嘢咪話唔信邪，有親兔仔出場嘅賽事，就算有波入，都未必帶挈到皇馬，就連今屆西班牙盃都輸俾丙組仔！
今個夏天皇馬為咗追基斯坦奴朗拿度呢個反骨仔，搞到冇時間入貨，淨係搵咗中場雲達華治嚟吊命；𠵱家冇晒攻力，可能就係要打吓防守足球，但求唔失波。至於爭標，似乎要問過「十步殺一人，千里不留痕」嘅巴塞喇！