金融海嘯下，人人愁眉苦臉，最驚搵朝唔得晚，無啦啦飯碗不保唔知點算。但噚日八方去咗大埔林村，就見到唔少人捧住個飯碗，個個一副唔憂柴唔憂米嘅開心樣，原來係林村十年一度嘅太平清醮，筵開成1,200席盆菜齋宴，真係場面盛大。據當地鄉紳透露，當中百幾席係「士啤席」，畀唔係村民嘅路過市民或者遊客埋位就食，噚日所見全場爆滿，唔排除同金融海嘯有關喎。
唔使登記免費任食
大家都知，有棵許願樹嘅林村係香港旅遊名勝，但原來最巴閉係十年一度嘅太平清醮，據聞村民期間要「禁伐木、戒殺生、不沐浴、酬神恩以及祭幽靈」，可見對呢件事幾咁高度重視。
噚日佢哋就喺林村嘅放馬莆舉行萬人盆菜齋宴，筵開1,200席，絕對冇因為金融海嘯而縮減規模。據林村鄉戊子年太平清醮建醮委員會副主席陳灶良透露，千幾圍齋宴中，其實約有150圍屬於「士啤席」，即係所有人唔使登記都可以隨便入席唔使錢任食，肯定冇政府整啲資產同入息審查先畀人攞到生果金咁麻煩。
雖然唔係因為金融海嘯而搞免費午餐，但陳灶良話噚日眼見嗰百幾圍入席率都幾高，都好開心㗎。可能唔多唔少都關金融海嘯事啩，但佢哋絕對無任歡迎，多多嚟都有得食，因為呢個係神人共樂嘅日子，最希望大家食得開開心心。
佢話一連五日林村仲有大戲睇，噚日就請到圓玄學院誦經，鳴芝聲劇團做粵劇。除咗新界原居民蓋鳴暉粉墨登場，連馬浚偉都有嚟唱歌贈興，免費任食之餘仲有免費娛樂，難怪在場人士都四萬咁口。
新界人咁重視嘅日子，有新界特首之稱嘅鄉議局主席劉皇發點可以唔到？忙於度橋令地區小型工程快啲上馬嘅民政事務總署署長陳甘美華，以及大埔區議會主席張學明都有現身，除咗一齊為清醮舉行揭幕儀式，仲順道為香港上香祈福，祈求香港風調雨順，合境平安，希望港人有堅強意志，可以捱過呢個金融海嘯就好喇。
mailto:[email protected]