八十年代，人人叫HondaCivic做「思域仔」，啱嘅，部車細架，駕駛者年輕，馬力夠性能好價錢合理，話Civic仔等於飛仔車，確係啱晒數。N年後嘅今日，Civic經過不斷換新裝，已經唔再細細架，外形斯文就似着咗西裝，唔再飛仔，仲新增加減撥片，駕駛樂足玩味強，我敢講句──前所未有咁好玩。
記者：梁美甜
攝影：梁細權
模特兒：MiuLau（TheGroup）
高速掟彎有驚喜
Civic早幾年開始修飾車款，外形斯文得嚟又保留到跑味，唔再一味俾人當飛仔車咁辦，走入中環俾Executive揸都夠格。全新09款Civic再接再厲，小改款沿用上一代引擎，改動項目包括新式鬼面罩、頭尾鍍鉻邊飾、頭唇、頭尾燈，軸距增長咗，安全配備同懸掛系統重新調校過，令全新Civic車身重量稍增，剛性大大提升，高速入彎依然好定。
試車當日貪玩，行緊80公里，唔收油轉咗個接近90度彎，嘩！拋就拋，但好穩，車身稍向外拋但好快入番車道，身邊人好驚嚇：「無心理準備嘛！仲以為失控，張凳最正，夠承托力，如果唔係實俾你拋咗出去。」新車增設軚環撥片，日常出入代步，一個自動波走天涯當然無問題，心血來潮玩吓性能速度，咪用加減波劈番轉囉。要自主玩高度操控亦無問題，拉落S波，撥動任何加減撥片，儀錶板上液晶顯示出M字，即傳動系統改為Manual，「棍仔」樂趣兼具，又係盞啫。
思域迷：新車實淨咗！
當日CivicFansAlan試玩，見佢一身老西一派斯文，原來十幾年前已經劈開Civic，「以前Civic俾人覺得係飛仔車，無法啦，車身輕，1.8公升好夠力，踩多兩踩就飛喇。」想當年Civic仲要連外形都好飛仔吓，「係！新車唔同晒，揸落實淨，懸掛好咗，路面Impact細咗，隔音做得唔錯，高速入彎車身指向性高，好玩！」開頭冚研究，「i-VTEC偈夠爆發力又慳到油，頂Bar同車身連埋一齊，怪不得剛性好咗，又無咁多路噪。」新車最大特色係加咗軚環撥片喎，「唔使下下高轉入波咁嘥油，香港路面車多，切線爬頭反應要快，新偈同新波箱做到嘢。好多鍾意揸車嘅人未必要求部車太多花巧配件，就算係好Premium好齋一部車，性能好操控性高已經好足夠，Drivingpleasure嘛！」
HondaCivic1.8VTi4-doorSedan規格
引擎：1,799cc直四i-VTEC
馬力：140ps/6,300rpm
扭力：17.7kgm/4,300rpm
傳動：五前速自動波連軚環加減撥片
售價：$199,880
查詢：合群汽車（23802231）
