奧巴馬都未坐正，就已經事先張揚要在兩年內創造250萬個職位，語氣十足十舊約先知。
老實講，奧巴馬可以令好多反美分子，都忽然愛上美國，淨係呢點，已經好勁。250萬個職位？真係唔敢想像，明年1月20號之後，奧巴馬要履行承諾，到時，大家都可以見到佢change得幾厲害。奧巴馬如果識中文，世民贈佢一句︰「選舉完咗好耐喇！」
另一邊廂，英國又放風，話要立法強制銀行借錢畀中小企。如果大家都知道，次按起源，其實係民粹政策CommunityReinvestmentAct，相信大家聽到呢宗新聞，都會向上帝祈禱，希望主會賜智慧畀白高敦。
冀主賜白高敦智慧
如果大家唔係好熟悉CRA，就暫且容許世民不厭其煩再講一次90年代經濟史。
CRA係70年代產物。當時正值高通脹低增長，加上社會主義如日方中，美國政府無論如何都要「交功課」，結果就整條法例要銀行（就算債仔可能供唔起樓）放水。當時其實一早有人話，CRA會扭曲市場。結果，當然係俾政客兇，話自由市場冷血，唔體恤窮人，如果唔立法，無產階級就要一世交租畀資本家業主……
空頭支票唔好當真
白高敦政府如果真係立法，強制銀行「幫」中小企，就算有人出聲反對，估計都會俾人鬧見死不救。所以，別家事，世民都係無謂多講。
話唔定，白高敦只係想講得兇狠，出出口術。世民希望，曾爵士蔭權對西人開嘅空頭支票唔好當真，更唔好慌不擇言，人云亦云。
利世民