今年台慶頒獎禮賽果毫無驚喜，大贏家反而係郭羨妮，一個人一對導彈雄霸各大頭條，其他姐仔望塵莫及。佢哋為搶風頭拚個你死我活，務求輸獎都唔好輸個勢，平胸谷到變湯碗，幾千萬珠寶掛上身，博到咁，你又認唔認得邊個打邊個？
記者：吳允冲
Round1：估身
有無獎攞，其次，晒行頭掛到成身Bling、露天賦本錢着到超Sexy先係指定動作。今年台慶，個個花旦都Fullgear上陣，Round1先玩撈亂骨頭，人頭同身體亂咁配，你估唔估到以下身體屬於邊個花旦？
1.做慣阿二：
拍劇年資尚淺輩份高，鬥完靚聲再鬥爭老公，不過次次都要做阿二，今年頒獎禮睇住人高興，惟有返屋企搵同性密友呵番。
2.玉女姐仔：
唔聲唔聲嚇你一驚，谷胸搶風頭，性感長腿首次曝光，難怪佢話：「真係有啲怕醜。」怕乜醜？嫌你谷唔夠㖭呀。
3.情敵互數：
某歌星前女友，分手後事業更順利，最近同情敵狹路相逢，開火：「你着我舊鞋咋。」人氣急升，獲得飛躍進步女藝員獎。
4.攬狗喪喊：
無緣角逐視后，身材唔突出，惟有着男人西裝殺出重圍，都好，有番個安慰獎唔使成晚齋坐，今年同緋聞男友齊齊進軍樂壇。
5.上位攞女：
八卦新聞一向無佢份，今年憑實力演繹慘情攞女，獲一眾師奶支持，喊喊喊喊喊，終於喊到個最佳女配角獎，恭喜恭喜。
6.聲大夾惡：
嘈喧巴閉，火氣勁過黃毓民，全港食肆都唔夠膽得罪佢，隨處辣火頭都拎到最佳節目主持，真係要感謝主。
7.有情有義：
對患病男友不離不棄，樣貌同二十年前一樣，人人羨慕佢係不老傳說，做奸角都咁得人歡心，呢啲咪叫戲路縱橫囉。
8.人財兩失：
為靚靚佢無所不用其極，洗腸、換膚、節食，做事一絲不苟堪稱鐵人，傳聞最近炒燶股票，同拍拖十幾年嘅男友分手收場。
9.做慣阿一：
1968年香港公主冠軍，80年代同汪阿姐等合稱「四大花旦」，紅到𠵱家五十幾歲，係人係鬼佢睇得一清二楚，可惜揀錯老公。
10.長駐大廳：
78歲仲自己揸車返電視城，中氣好過唔少後生仔，同關淑怡合唱過《三千年前》，新年仲有新作《家有囍事2009》。
11.貼仔港姐：
額頭鑿住「慳家」兩個字，因同前輩個名讀音相同而被戲稱為阿姐，唔介意買樓貼仔，心地同身材都一樣咁偉大。
12.逼爆身材：
憑心口一個令人窒息嘅「人」字，令觀眾流晒鼻血，搶晒阿姐風頭，人氣返晒嚟，各位姐仔，有料要Show，學嘢嘞。
Round2：估人
女藝員經典造型多不勝數，今次唔玩撈亂骨頭，直頭唔畀個頭你睇，單憑造型，你又分唔分得出係邊位？
13.演技出眾：
最拿手做奸妃同師奶，2004年全城都撐佢做視后，最後大熱倒灶，個個都為佢抱不平。
14.今年退休：
04年贏視后輸民心，搞到聲淚俱下為自己平反。最近宣佈退出娛樂圈，專心照顧細佬，贏得掌聲。
15.小生殺手：
緋聞男友表水蛇春咁長，吳卓羲、馬德鐘、陳小春、鄭嘉穎統統俾佢收服，「小生殺手」絕非浪得虛名。
16.索爆港姐：
台慶頒獎禮化身《少林足球》阿梅，嚇親街坊。攞過金像獎同飛躍進步女藝員獎，同Leon傳過緋聞。
17.TVB「老闆」：
04年台慶出動三千萬私伙珠寶，勁過一班花旦。𠵱家要睇佢，就要轉去隔籬台喇。
18.啞妹上位：
05年度華裔小姐亞軍，《溏心風暴》扮啞女，以手語征服一眾電車男，一洗花瓶形象。
19.賺錢藝人：
有傳係TVB最賺錢女藝人，鬼妹性格走健康性感路線，與緋聞男友同一屋簷下。
20.洗底狐狸精：
明明係索女都甘心扮哨牙，搞到成面面油雀斑，終於成功入屋，05年賺到個飛躍進步獎。
答案
1.關菊英
2.鍾嘉欣
3.胡定欣
4.胡杏兒
5.楊怡
6.蘇施黃
7.米雪
8.鄭裕玲
9.李司棋
10.李香琴
11.楊思琦
12.郭羨妮
