鄧麗欣（Stephy）、吳雨霏（Kary）同孫耀威等噚日去咗樂富出席「平等機會委員會」音樂會，成班歌手同現場少數族裔小朋友手牽手揭開序幕，不過孫耀威就因之前出席無綫活動，所以姍姍來遲未有影大合照。
Stephy同Kary合演嘅新片《絕代雙嬌》今個星期四上映，以往Stephy拍嘅愛情小品都會以咀戲做賣點，對於今次喺戲中只有兩女對打戲份而沒有咀戲，問到兩人會唔會拍咀戲時，Stephy就話唔抗拒拍同性戀電影，不過因為自己同Kary太熟，所以一定忍唔住笑，而且佢一向當Kary係妹妹，互咀會有亂倫感覺。
Kary朱唇似咕𠱸
至於係唔係咀冇咁熟絡嘅傅穎（Theresa）會易啲時，同對方傳不和嘅Stephy竟然口快快話：「可能得。」連身旁嘅Kary都驚訝問Stephy係乜嘢意思，似乎兩人嘅不和再度升級，不過Stephy即刻補鑊話：「Kary個朱唇好似咕𠱸，好好咀，係同佢拍過咀戲嘅側田講㗎，其實我哋幾個一到邊個生日時就會互咀，Miki（楊愛瑾）同Theresa個唇好似我一樣咁薄，所以咀起上來冇乜feel。」
此外，孫耀威早前坐飛機時俾飛機師唔禮貌對待，事後仲慘被空中小姐唱佢態度惡劣，搞到佢食死貓，所以佢唔介意公開向傳媒投訴，希望啲空姐唔好再亂講藝人，至於佢擔唔擔心會被人blacklist，佢就抵死話：「仲好啦，我划艇上去，反偷渡囉。」