葉劉一入立法會就言行出位，搶到唔少鏡頭，但就難為咗唔少前同事。葉劉噚日出席一個電台節目時都直認，包括佢在內嘅政治人物個個都要爭出位、博曝光，立法會有啲戲劇性效果係好自然嘅事，反而勸啲官員要睇開啲、有風度啲，唔出聲就捱過去；如果同議員火併，就盞上頭條，情況好似佢當年推銷23條咁慘淡。
做過官嘅葉劉話戥啲前同事慘，但希望高官虛心接受議員意見。雖然一單外傭稅就搞到政府頭擰擰，但葉劉澄清無意搞亂檔，自己做咁多嘢都係要兌現選舉承諾。佢仲大讚俾佢鬧過嘅勞工及福利局局長張建宗EQ一流，俾人鬧到狗血淋頭都面不改容，一眾副局長要學嘢。