律師Y到杭州參加經濟論壇，認識咗一班香港金融界人士，其中一位係證券P。佢兩位在杭州傾吓傾吓，發覺左丁山係共同朋友，證券P一位手下就係律師Y嘅大學師弟，於是回港後就相約吃飯，搵埋左丁山出席，喺中環近近哋就去新世界大廈間翠亨邨啦。呢間中環老牌飯店屬中檔級，不高不低，價錢適中，昔年由美麗華酒店老闆楊志雲創辦，楊先生嘅同輩何添、鄭裕彤、冼為堅等就經常在此聚會傾生意。
現在美麗華酒店已為恒基收購，英文名字已改為MIRA，李公子擔了大旗，誓要大革新，「美麗華」呢個名字好有五十年代feel，改為MIRA，就似有二十一世紀觸覺，不過會否改到Westin（老牌）屬下一間酒店W（新品牌）咁前衞，仍未可知。品牌呢樣嘢，唔係淨係講宣傳，仲要用銀紙堆砌出一個獨特形象，營運作風與高質素產品出嚟，中間要花不少心血。
好嘞，未行到翠亨邨，律師Y電話已到：「喂，啱啱點好菜，你喺邊？」左丁山急忙三步變為四步，衝上翠亨邨，未坐低啫，餸菜已到，不禁嘩一聲：「乜起菜快過快餐店？」證券P係常客，佢笑笑口話：「中午係要咁快起菜嘅，我哋要在下午開市前返到公司㗎。」於是餐飯好快食完，大把時間傾偈。左丁山問證券P：「銀行有冇響應任總裁，放寬貸款？」證券P話：「食甜品啦，邊度有得放寬呀，唔cutline已經算偷笑啦。大銀行放款畀我哋，我哋借錢畀客戶做孖展，銀行體諒我哋業績唔錯，有借有還，故此最近通知唔收遮，但要加息，其他行家可能冇咁好待遇㖭！」
金管局為免港元太強，係咁放水買美金，等拆息市場水浸，同業拆息率偏軟，但銀行一聲多謝之餘，一於P就唔加，息差（spread）就加，一啲貸款由HIBOR+0.5，改為HIBOR+1.5，假設HIBOR不變，息差實際上躍升三倍，證券P當然唔使畀呢一個價錢，但難保好多中小企唔會畀得更高。削減利率係全球大趨勢，美國、瑞士、日本邁向「零息年代」，但大家咪以為這是好消息而入市，好多公司其實比以前付出更高息。