咁嘅時勢，打工仔心慌慌，眼尾擸到老細行過，都要即刻對住個電腦起勢咁打字，或者拎起個電話扮call客，顯示工作幾咁繁忙、自己好有存在價值啦。但咁都唔夠㗎噃，我哋嘅特首煲呔噚日就喺秘魯越洋親身示範侍奉老細之道，教大家點樣先算「做好呢份工」。
喺秘魯利馬舉行嘅亞太經合組織（APEC）領導人峯會終於結束，各國同地區嘅領導人按照傳統，着起秘魯特產嘅羊駝毛斗篷影大合照。國家主席胡錦濤同煲呔仲分別獲安排，企喺東道主秘魯總統加西亞嘅左右兩邊，排位嚟講都算係幾有face。
主動行去同老細搭訕
各國元首雲集，自然趁機寒暄一番，胡總就一路行一路同好鍾意講普通話嘅澳洲總理陸克文雞啄唔斷，反而影大合照時，就一直同煲呔零交流。着住斗篷卻好似披住個麻包袋嘅煲呔都知要做嘢，去到發表宣言環節，煲呔特登主動行埋去胡總度，好恭敬咁同老細搭訕。佢哋望住背後幅印加帝國古蹟馬丘比丘嘅巨型照片，傾咗成分鐘。
特區政府冇透露煲呔究竟同胡總傾咗啲乜，但煲呔向以秉承香港醒目仔精神見稱，早排溫總喺莫斯科發表關於香港點樣面對金融海嘯嘅講話，煲呔聽完都應該知道阿爺唔係咁滿意香港嘅走勢，自己民望又插晒水，管治手法越嚟越有阿董feel，照計佢都同時下打工仔一樣，應該好有危機感。
有心水清嘅人士仲發現，早兩日胡總同煲呔喺利馬見面兼食早餐，其後煲呔見記者時，話胡總清楚表明，中央對特區政府就金融海嘯所做嘅工作同採取嘅措施，給予充份肯定咁話。但事後內地官方發稿，只係話胡總高度評價香港協辦奧運同參與四川救災，對於金融海嘯，就只強調會支持特區去抵禦，兩者似乎有出入。
咁嘅情況下，煲呔唔醒定啲點得吖？不過，淨係靠傍住老細始終唔係長遠之計，睇嚟煲呔返到香港，都要向水深火熱之中嘅香港人有啲交代，確確實實做番啲嘢先得。
mailto:[email protected]