捱過回歸後的金融風暴，撐過03年沙士疫潮，面對這次據說是百年一遇的金融海嘯，鳳姐阿Jade仍堅守她的鳳樓小單位，「惟有收平啲，服務好啲，守夜啲。」過去的恩客，成了雷曼苦主、無工開的地盤工，甚至「老闆連遊艇都賣埋」的失業打工仔，他們現在不是失了蹤，就是「上到嚟就呻」。雪上加霜的是黑社會也要淡市開源收陀地，碰到打劫、偷竊食霸王餐者更是無日無之。
越窮越見鬼，見盡低下層百態的性工作者，此刻最能體會箇中滋味。
「收陀地打劫成日有」
記者訪問阿Jade時，還未發生荃灣鳳姐命案；她已說，經濟不景，生意慘淡，屋漏兼逢連夜雨，「港島區有人收番陀地，幾個𡃁仔上嚟，一個星期收成500蚊。」有些同行報了警，至今未有人被捕。「仲未計多咗打劫，順手牽羊偷手機或者姐姐仔啲名牌袋，食霸王餐嘅就更加成日有。」
「偷嘢嘅被發現，仲同我哋講話畀次機會，江湖救急，走投無路呀之類。着西裝嘅都有，賊樣冇得睇，所以好難防。」賊匪難防，搵食更重要，「個市靜咗好多，就算上到嚟都預咗減多啲。成功入閘嘅，三百五要收三百。以前一日做十個八個客，𠵱家一日有三個已經好高興，呢個月仲有一日捧蛋，收入至少唔見兩、三成。」
阿Jade九十年代入行，看過香港情色事業風光的一頁；有姊妹十幾年前在大型骨場一日做十幾鐘，月入十萬元。記者見識少，質疑「十萬蚊咁多？」阿Jade不以為然：「嗰個年代十萬蚊唔算多，一日都搵到成三千幾蚊啦。」這個姊妹現在月入一萬多元，「𠵱家生意唔好，加上體力不如前，惟有愛心搭夠。」
「都唔知會差到幾時」
阿Jade擔心，今次的困境比過去的惡劣，「當年金融風暴之後，業主肯減租，六千減到五千一，但𠵱家交租都要七千。沙士時就好多人唔開工，競爭少咗，而且都係一段短時間啫。但今次，都唔知差到幾時，轉行都唔知轉去邊。」經濟差，多了中年婦女入行；卡拉OK夜總會沒有生意，年輕小姐又轉做一樓一；還有，內地工廠倒閉，一批生力軍投入市場。
「有啲以前做按摩、理髮嘅，退咗休都要返出嚟做，因為供到個仔讀大學都搵唔到嘢做。50幾歲惟有轉型謀生。」
紫藤幹事林依玲說：「其實經濟唔好，性工作者更有社會功能。面對失業裁員嘅生活壓力，啲男人唔會搵社工輔導，亦未必同屋企人講，佢哋搵姐姐仔傾心事，反而可以減吓壓。」她希望警方不要打壓，斷絕性工作者的生計。
記者 陳沛敏
