以為買股票先會坐艇，點知一場金融海嘯，原來買乜都可以坐艇！前幾日聽公關朋友講，喺某酒店食完晏，經過見到某名牌搞緊privatesale，即刻入去睇吓有乜好嘢，點知發現呢隻平時唔多肯減價嘅牌子，今年一開始privatesale就已經劈價至一折，初頭以為眼花，後嚟證實係堅嘅佢差點失去理性掃貨，但始終經濟唔好，所以佢都唔敢太狠，結果只係買咗對鞋同個袋。
名牌貨跌價快過港交所
第二日，公關朋友跟同事咁啱經過同一酒店，佢同事見到privatesale捉埋公關朋友入去睇，點知唔睇尤自可，一睇已經劈價至一折嘅貨，第二日減上減，雖然只係個別貨品，偏偏公關朋友買嗰對鞋就中招。佢同敏妮呻，買港交所（388）坐艇都可以賴政府入市畀佢無限憧憬，但買鞋都坐艇，都唔知可以賴邊個。
公關朋友呻，所買嘅鞋同袋，都係返工用，家陣買嘢未夠一日就跌價，有啲唔抵嘅感覺，令敏妮諗起一位著名女作家曾經講過嘅說話。呢位女作家話自己好少喺減價時買嘢，原因除咗佢有品味兼有錢，所以唔會同人搶減價貨，另一原因係，佢覺得如果一樣嘢你一見到已經非要不可，你根本唔會等到減價先買，如果見到件貨仲可以忍到減價先買，即係件貨喺你心目中唔係非要不可，咁不如慳番。
你可以話呢啲係有錢女人嘅心聲，但喺緊縮經濟下，每次買嘢，不妨問吓自己，可唔可以等到減價先買，可以嘅話，就放低件貨離開現場兼忘記件貨啦！
溫敏妮
http://wanmanli.com/blogs/