港大、中大一年一度校長盃今日踢友誼波，過去四屆中大兩勝一和一負，正路應該睇高一線，不過領隊新亞書院院長黃乃正同八方講，今年陣中傷兵多，佢打羽毛球時傷腳，不能上陣，其他射得之人亦有傷，加上隊波剛踢完校內聯賽，恐怕體力不繼。唯一寄望係副校長程伯中，因為佢係福將。
中大喺港大面前扮矮仔，可能係擾敵戰術，港大亦玩謙虛，有教授笑言校長徐立之係「黑氣石」，佢落場最少輸一粒，今年校長腳患在身，唔出場可能仲好，然而八方知道校長已準備全副裝備，包括黑色戰衣，同埋由加拿大帶返香港嘅「勝利眼罩」。
港大足球隊領隊陳龍生教授自嘲隊波係「老人隊」，平均年齡估計達60歲，隊員腰圍平均44吋，奔跑時速低於3公里。話雖如此，陳教授話今年有秘密武器，已招攬一名甲組腳做外援，亦搵咗班少壯派戥腳，希望一雪前恥。八方通水畀中大，聽聞港大校長資深顧問史秉士腳頭好勁，落場千祈唔好走漏佢。