首長系幾家股份，最受惠阿爺開水喉救市嘅，要推首長國際（697），加埋集團預期PE得兩倍水位，要買。首國呢幾年專注鋼材業，脫胎換骨，單係08年半年度（6月底止），集團純利已經倍升，上到近11億銀。只係好保守計數，首國全年度純利只係翻半番到21億銀，預期PE講緊得2.4倍。
要咁睇，呢期阿爺推出4萬億救市措施，當中包括大型基建及鐵路項目，而首國又主打寬厚板及高增值鋼材，食正基建救市條水，對嚟緊兩年增長，已經保證。又首國大股東首鋼控股（揸住約莫39.5%），加埋長實（001）呢粒星，股東實力已經毋須多講。咁啱月中，機構投資者LazardAsset以每股0.86元，增持首國逾2000萬股，持股量上到9.2%，大孖沙用真金白銀，投首國信心一票。簡單計數，首國現價翻一番到1.40元，08年預期PE，都係得4倍水位，抵買冇？
一拖有前景極抵買
9月14號主打一拖（038），建議博翻半番到1.50元，集團10月第一次到價。呢轉翻兜，再博翻半番。呢期阿爺谷內需，連同一直以嚟嘅強農扶農政策底下，對提升農業機械化，提高農民收入，一拖絕對受惠。
保守計數，政策措施去到明年先開始反映，一拖08年度預期PE，keep番往績5倍，現價（1.30元）翻半番到1.95元計，PE亦未上到雙位數。以有前景嘅企業，目標PE水位，仍然係非常抵買。
錢雋