議員Ｔ突然來電約飲茶，啱啱是日睇醫生，冇約會，於是欣然赴約，一齊上陸羽吃「牛肉炒米兜亂」，議員Ｔ邊吃邊叫好，跟住出題目考左丁山：「有甚麼政策可以解救目前經濟環境？」
嘩，件牛肉幾乎自口中跌出。議員Ｔ問錯人咯。左丁山素來是經濟右派，信奉自由市場，主張積極不干預、小政府、大市場。上次立法會辯論引用特權法調查雷曼事件，尊貴的馮檢基議員罵陳家強局長，罵特區政府仍然堅持大市場小政府嘅理念，嗰副嘴臉，令左丁山好驚啫，做議員可以咁威風嘅，唔怪得人工咁少都要搏命競選。（按：立法會議員嘅薪酬實在與佢哋嘅工作時間與政治責任不相稱，加到年薪一百二十萬元亦不為過。）
議員Ｔ係要問，徵求各方意見，左丁山唯有講，請銀行放寬貸款予中小企，實在強人所難，政府唯一辦法係擴大出口信用保險局嘅保險信貸範圍，向銀行提供打足貸款擔保。現時出口以放賬（openaccount）者居多，與信用證L/C嘅穩健性相差甚遠，純睇訂單而借錢，難度甚高。
不過，以左丁山呢類人嚟講，成日話不干預，政府使乜搵你做顧問呀。信凱因斯、馬克思就唔同，佢哋認為政府萬能，對衰退經濟有辦法可以起死回生，所以好受歡迎，容易進駐政府顧問委員會，甚至成為大官（英美多的是）。香港有個好例子，平時講慣無為而治嘅地產施，一受政府垂青，就建議政府在非豪宅價格下跌三成之時，就成立物業基金買樓救市啦。
儘管特區政府想干預，冇乜板斧。香港政府官員慣咗循規蹈矩，遵守法規，按章辦事，不徇私，所以十分公正、清廉，以此飲譽世界。一旦要佢哋干預銀行貸款，指導如何貸款畀工業界咯喎，佢哋就會不知所措，驚住畀廉記抽秤，長俸不保。內地官員慣咗乜都管，伸手到國企，容易過乜，香港官員自入官門嗰日開始，就學習要守法，緊跟廉記守則，以程序為本，目標為次，故此完全沒有干預市場心態。