從政應該whiterthanwhite，個底白過白紙最好，廣播處處長黃華麒堪稱最「白雪雪」台長，謝絕桃色。佢噚日主持上任後首次公眾諮詢會，聽吓市民對港台有乜意見。黃華麒話上任三個半月，不斷進行內部檢討，經佢整頓終於執正港台，無論公共資源管理、財務控制通通上晒軌道，歷史遺留落嚟嘅漏洞亦已一一堵塞，「我40年生涯裏面，𠵱家港台（制度）係最嚴謹嘅。」
黃華麒：我枉過半生
黃華麒一次過寸盡幾十年來歷任台長都未夠皮，仲講笑話：「我唔識飲花酒，煙、酒、女人同我絕緣。」對於自己冰清玉潔，佢慨嘆少好多樂趣，「我係枉過咗半生㗎嘞！」因為一個Coco而落台嘅前處長朱培慶，如果聽到呢番話唔知有乜感受？
噚日個諮詢會意見光怪陸離，有個中佬舉示威牌念打油詩，有的士司機叫港台學吓友台，搞多啲送油券活動。最騎呢嘅，要算係有聽眾要求港台製作多啲靈異節目，講多啲鬼故，「如果啲主持人怕鬼，可以請啲捉鬼大師坐鎮做主持。」港台成日播高官講話，「減薪論」就十分具驚嚇性，恐怖過鬼故。
謝偉俊力薦白姐姐
立法會議員謝偉俊噚日都有到場，佢話金融海嘯社會怨氣多，市民生計、感情都面對好大壓力，可惜近年電台卻少咗深宵訴心聲感性節目，佢認為港台有責任慰藉小市民心靈，「我申報利益，好似白韻琴嗰啲，盡訴心中情呀！」
有個港台長期女fans，自稱由6歲聽港台聽到家陣66歲，噚日凌晨4點起身，由離島去尖沙嘴出席諮詢會。佢批評港台主持詞彙貧乏，成日用「好正斗」形容食物，「正斗我都唔知究竟即係鹹定甜！」黃華麒聽完咁多意見，話白姐姐係「德高望重兼成功人士」，港台一定會考慮搵佢開咪，「我覺得可以多啲呢類節目。」至於靈異節目，佢就話廣播條例不容鼓吹迷信，而且現時社會負面消息多過正面，港台製作多啲溫情、積極嘅節目較重要，唔需要製造恐懼喇。