逆市求生，人人慳得就慳，所以百貨公司大減價人頭湧湧執平貨，另一個淡市奇葩行業，原來係電車，即係香港人好有親切感嘅叮叮。
電車公司常務董事易志明同八方講，今年10月載客量有23.2萬人次，較去年同期微升3%，同今年頭九個月平均載客量比較，就多咗5.3%，佢相信同經濟不景有關，短途客為咗慳車錢，捨其他交通工具而搭叮叮，因為叮叮只係兩元，平盡全城，估計未來幾個月客量都有增長。
多咗電車男、電車女，電車公司每日多17,000元收入，班次亦相應增加，候車時間大約短一分鐘，平均三至四分鐘就有一班車。天星小輪乘客則未見明顯變化，每日客量維持約4.3萬人次。