自由黨縮水後，真係要睇餸食飯，退咗黨反而有運行。九龍城區議員黃以謙幾個月前退出自由黨，好多人以為佢政途行人止步，點知退一步原來海闊天空，政府噚日宣佈特首委任佢做市建局非執行董事。
唔跟田少有着數
黃以謙話做安老事務委員會時，認識當時做社署署長嘅林鄭月娥，𠵱家林鄭做發展局，可能因此諗起搵佢再幫手，加上佢係老齡精神科醫生，舊區重建要顧及長者需要，呢方面應該可以畀意見。佢又強調歷來擔任公職，均與自由黨無關，所以今次入市建局，亦同佢係唔係黨員冇關係。
不過有政界人士笑言，煲呔委任前自由黨員可能想寸田少，顯示唔跟田少有着數，識時務者應該知條路點行。公民黨陳淑莊、民主黨涂謹申都獲委為非執行董事，前者有示好意味，涂謹申則屬「翻閹」，因為做過土發成員。其他新非執董包括國泰程鼎一、許焯權、簡兆麟、林濬、潘展鴻、工聯會黃國健，任期下月1號生效，為期三年。