被拘留17日嘅日本過氣音樂教父小室哲哉，前日以約244萬港元保釋外出。據知山窮水盡嘅小室，今次全靠老婆KEIKO為佢向avex籌集保釋金。雖然avex因為小室被捕，被迫中止發行組合globe嘅兩張細碟，白白冇咗逾80萬港元，但念在小室喺90年代為公司賺唔少，所以願意借出呢筆大數目。噚日係小室同KEIKO結婚6周年紀念，佢哋會留喺KEIKO大分縣嘅娘家度過。