所謂賤物鬥窮人，呢排經濟唔好，好多地方開倉減價，我都喺呢啲地方留低唔少頭髮，（唔通留低腳毛咩﹗啋﹗）。關於減價開倉攻略，都有唔少心得同大家分享吓。
首先係「出外靠朋友」，因為唔少名牌為咗唔想搞到形象cheap，但又要減價去貨，所以就搞咗啲咩「VIP開倉日」、「員工特賣」之類，其實好鬼兒戲，例如一個「D」字頭名牌月中嘅privatesale，話明要有邀請卡至可以入場買嘢，但我好多friend其實都收到邀請電郵，電郵入面有成五、六張邀請卡，仲可以影印㖭。仲有MarcJacobs等喺上個禮拜開倉，雖然話明只係員工特賣日，但我啲朋友去到根本連check都唔check。睇怕，咁嘅環境，有人嚟買都好啦，仲搞咁多規矩做乜﹗
另一點要注意嘅，係有啲所謂開倉減價貨，其實都唔算平，我兩個friend阿Joe同阿TO，佢哋上年喺I.T買咗件izzueFW07米色短褸，原價成千蚊，折實400幾蚊，佢兩個前幾日又去I.TXXShoppingSpree，諗住I.T話明係20歲周年勁減，點知俾佢哋睇到同一件褸，一樣都係減價賣400幾蚊，佢哋話：「過咗咁耐，個款都過時啦，點算平喎。」
電郵：mailto:[email protected]
逢周六、周日刊出