早排泰林電器執笠半價清貨陳列品，都唔係好着數，一個唔覺意一用即壞，加上冇保養，真係喊到冇謂。話時話，𠵱家啲AV產品、家電等推出巿場冇幾耐都跌價兩、三成啦。加埋時勢唔好，賤物鬥窮人，新機都平到你唔信，好似啱啱推出巿面嘅全高清數碼攝錄機，講緊賣千幾蚊，真係海嘯價。
比巿面攝錄機平七成
日本潮流產品專門店JCShop老闆Alan話，專攻潮人巿場嘅日本品牌Speed因應時勢，推出咗一部手槍型SpeedD5全高清數碼機，喺香港同步發行，定價1,380元，仲平過日本。Alan話，雖然𠵱家時勢唔好，啲人買嘢確係手緊咗，但只要物超所值，消費者仲係肯買，尤其係20幾歲嘅年輕人，佢哋嘅消費力都好強，聖誕節更加肯花錢慶祝。
Alan話，好似呢部D5，比巿面賣緊5,000幾蚊嘅全高清攝錄機平七成；另一賣點係最輕嘅全高清機，重量只有150克，採用16GB記憶卡以全高清格式拍片可以錄到兩個鐘，加埋影相嘅有成800萬像素，一部機搞掂晒。機殼顏色係香檳金，啱晒潮人。
小藍即場試用，真係好鬼死輕，操作容易簡單，不過有啲玩具feel，但係講緊千幾蚊，都冇乜嘢彈。
逢周六刊出