香港地遍地黃金，街外錢真係可以齊齊搵？好肯定答你──可以，街頭藝術表演者個個身懷絕技，樂器在手加幾粒音符就可以無本生利，時薪分分鐘仲好過M記。平時行街經過見到，有緣份咪停低欣賞吓囉，不過若然真係想入行，就要諗清楚嘞。
記者：許維雅、王震遠、吳允冲、周靜雯
攝影：周旭文、楊錦文、伍慶泉、譚盈傑
旺角
人狗闖街頭 每小時收入：約$50
2000年開始喺旺角賣唱，2005年搬到旺角行人專用區，帶埋愛犬大眼仔一齊擺檔，咁多年街頭生涯，許伯話乜人都見過：「以前有人搞事，收我陀地，唔畀咩，就特登搵人喺你隔籬同你鬥大聲，最後搞到警察干預，大家都趕走，一拍兩散。」𠵱家已經無人收陀地，反而一班來自祖國嘅集團式乞兒最過份，「試過有個女人，指使個小朋友走過我檔口，然後扮晒唔識嘢咁喺我個兜度攞錢，正宗乞兒兜攞飯食，又試過聲大夾惡霸我檔位。好彩，好多街坊都會幫手，話我自力更生，應該支持吓。」
擺街檔無人趕咩？許伯話：「之前有，不過我喺呢條街唱得耐，警察都認得我，喺旺角街頭算有知名度，我無攞綜援，大家知我靠自己能力搵食，唔會再趕我走。」夠唔夠生活？「每晚都有百幾蚊，以前日日唱，收入會多啲。」金融風暴對許伯都有影響，路人再無咁疏爽打賞，試過最差一日得$20。由於有知名度，好多傳理系大學生都會邀請許伯做專訪，「佢哋都會畀番啲車馬費我，算係收入一部份啦。」
開檔直擊
1.七點前落旺角開檔，六點幾出門口，每日風雨不改由白田屋企踩單車到西洋菜街。
2.踩半粒鐘到檔位，單車變身賣藝攤檔，安置好大眼仔先！
3.唱歌前許伯會講時事發表意見，連TalkShow都做埋，勁！
地點：西洋菜南街行人專用區尚書房對出
時間：8:00pm-10:00pm
技能：彈結他唱歌仔，擅長許冠傑《莫等待》、《學生哥》等歌
最受歡迎：除咗大眼仔，一唱《加價狂潮》，即刻多咗人打賞，可能係呢個時世，多人感同身受
乜人睇：特別多女仔，因為有狗仔睇，有唔少遊客影相留念
欣賞指數：★★★★★
CD每隻廿皮 每小時收入：約$20
唱作人蓋安樂喺旺角東站賣唱，Set晒Poster同剪報介紹自己，仲自資出版唱片，雖然設備最齊全，咪、喇叭同結他都係專業貨色，歌藝喺旺角區嚟講亦尚算不俗，好有麗花皇宮Feel，但反而引唔起途人興趣，個個視而不見。
地點：旺角東站
時間：7:00pm-10:30pm
技能：One-man-band
最受歡迎：Poster、剪報、CD，夠大堆頭
乜人睇：放工人士，得個睇字
欣賞指數：★★★
阮琴+口琴起雙飛 每小時收入：約$15
阿伯彈阮琴吹口琴，技術好似未到家，但又彈又吹確實充滿誠意，雖然無乜人留意到佢唱緊《順流逆流》，但又好嘢喎，差不多每分鐘都有好心途人，打賞幾個散銀。
地點：豉油街行人隧道
時間：6:00pm-9:00pm
技能：阮琴、口琴加唱歌
最受歡迎：響亮歌聲
乜人睇：西裝友同OL
欣賞指數：★★
尖沙嘴
靚聲任點唱老歌 每小時收入：$50
行到北京道行人隧道中間，遠遠傳嚟悅耳歌聲，一首首老歌簡直聽出耳油。
鄭大姐已經喺隧道表演咗幾年，去過廟街、老人院唱歌，好多經典金曲如《天涯歌女》、《甜蜜蜜》都曉唱，有時下午去灣仔唱兩粒鐘，返屋企煮完飯再落尖沙嘴唱番兩嘴，好多老外都捧佢場，有次仲邀請佢上山頂酒廊演唱，果然識貨。
地點：尖沙嘴北京道行人隧道
時間：8:00pm-10:00pm
技能：靚聲唱老歌
最受歡迎：過百首經典老歌任你點，即時清唱
乜人睇：西裝友、老外遊客
欣賞指數：★★★★
灣仔
彈二胡自我陶醉 每小時收入：約$25
初頭以為老伯失明，原來係美麗的誤會，佢只係合埋眼好Enjoy咁拉二胡，可惜大部份途人都係掂行掂過，可能演奏啲歌唔啱港人口味。側面戙咗班問卷調查員擾擾攘攘，老伯從容不迫當佢哋無到，唔使睇譜已經背晒入腦，好好記性。
地點：灣仔地鐵站A3出口
時間：8:00pm-10:00pm
技能：拉二胡
最受歡迎：憂怨二胡樂曲
乜人睇：西裝友居多
欣賞指數：★★★
電子琴笑住講多謝 每小時收入：約$50
有人彈《相思河畔》，走近昅昅，原來有位婆婆喺街邊彈電子琴，每當有途人打賞，曾婆婆就笑逐顏開講多謝。佢老當益壯無腦殘，隨便點首《世界真細小》都仲記得點彈，間唔中又會拎出隨身帶備嘅自製樂譜，揀歌仔彈。
地點：灣仔地鐵站B1出口
時間：7:00pm-9:30pm
技能：彈電子琴
最受歡迎：點歌仔即時彈
乜人睇：西裝友忍唔住停低聽婆婆彈琴
欣賞指數：★★★