幾年前星爺套《功夫足球》叫人難忘！今年荷李活翻抄舊橋，唔同嘅係足球變成國寶熊貓，再加上武術正式成為京奧比賽項目，令今年6月上畫嘅《功夫熊貓》更加熱鬧！DVD版日前派街，能否將功夫熱帶到入每一間屋不得而知，但睇完熊貓耍一大輪功夫，起碼笑到你肚痛！
記者：陳國輝
豬腩熊貓變身高手
故事講述好食懶做嘅熊貓阿寶，一直醉心中國功夫，卻因父親希望佢繼承祖傳麵檔而未能專注武術。一次誤打誤撞下，竟然被認定為傳說中嘅武林高手「龍戰士」，並且委以重任，奉命對付武功出神入化嘅奸角大豹！眼見阿寶只擁有一身豬腩肉，喺咁短時間內，點樣訓練佢成為名震江湖嘅功夫大師呢！
睇中國3D水墨畫
記得幾年前睇《怪獸公司》，據講大怪獸毛毛身上嘅每一條毛髮都經過電腦精密計算，並以物理狀態模擬出真實嘅環境，睇落唔多覺，原來咁鬼講究！嚟到《功夫熊貓》，主角阿寶、施福大師等，全部乃「毛界」生物，幾年後再講呢樣嘢，似乎冇乜TalkingPoint，更值一提，反而係以中國四川為背景嘅地方，雖同樣由3D繪畫，但經處理後嘅雲霞景色，甚具中國水墨畫味道，到下次出埋Blu-ray版，話唔定效果更震撼！
內置Games練功夫
今次嘅BonusTrack相當特別，唔再係睇完一次就要攝落床下底。例牌內容譬如製作花絮、導演以及配音人員專訪等固然冇走雞，同時仲內置一隻名叫「龍戰士訓練班」嘅MiniGames，顧名思義，玩法係同電影內容有關，玩家只要操作阿寶完成各項特訓，過晒5大關卡就能夠成為真正嘅「龍戰士」！難唔難玩因人而異，純粹考你反應；如果唔鍾意打機，Bonus入面仲有《史力加》、《荒失失奇兵》等幾套卡通嘅音樂MV，當半隻SoundTrack聽吓都唔錯㗎！
三版本DVD豪送禮
雖然今次未見到有Blu-ray版，但其實DVD亦分成三個唔同版本推出，可謂各有各精采。除咗最基本嘅單碟版，雙碟版則分為「限量打不死不倒翁雙碟版套裝」以及「限量雙碟版禮品裝」，售價同為$208，前者附送阿寶嘅不倒翁公仔，充氣後差唔多有半個成年人咁高；而後者就附送阿寶毛公仔，認真啱細路仔！
