喺今個月4號被拘捕嘅日本過氣音樂教父小室哲哉，噚日被大阪地檢以詐騙罪名正式起訴。當日同小室一齊被捕嘅兩名同謀入面，其中一名小室所屬製作公司社長就因為涉案唔深而冇被起訴。小室喺06年8月以自己創作嘅806首歌曲著作權，向一名兵庫縣商人詐騙5億日圓（約3,890萬港元）。小室喺噚日黃昏獲准以3,000萬日圓（約244萬港元）保釋，佢離開大阪地檢署時向在場記者鞠躬道歉。