中小企老闆執笠後爭住應徵做保安員，新聞說這一行成為落難老闆的避難所。世界艱難，實Q唔易做，入職打崩頭，有冇人另謀打算，把心一橫撈偏？小巴司機入線費原來要三十萬，黑社會攤大手板，搵錢易過叫客仔落疊買ELN的銀行職員。各大機構陸續裁員之際，黑社會呢口飯，可能都有人爭吃，隨時衍生出「二手黑社會」這樣怪雞的結構性過渡期工種。二手，唔係正印，但行出來仍然擺晒款，專門欺壓老弱婦孺。老小巴司機正是淋紅油對象。趁此金融危機，實行一舉將黑社會趕盡。「俾條生路行下好喎。」二五這樣說。係，股樓齊升之時唔計較，息事寧人。
今非昔比，人窮到想燒炭，你阿爺的還上門敲詐，佛都有火。我估計未來日子黑社會跳樓的個案會急升，油尖旺那批曾經大言不慚「十二點之後這裏由我話事」的蠱惑仔會飽受衝擊。蠱惑仔踎監當食生菜，監獄很難幫他們轉型，除非請程介南幫手，民建聯做後援，在監獄招兵買馬，動之以利，誘其入黨。英雄莫問出處，中年人辦有程兄做model，少青族就有克勤仔教你搓胸上位，印證老左金句，黑社會都有愛國的。域多利監獄重開之期應當不遠了，街坊最爽，此甲級靚地永遠不會起屏風樓或者做盛智文的𡃁。