股市跌到面無人色，好多富豪都輸錢，甚至傳出有富豪要入醫院休養靜靜心，自由黨前主席田少自爆炒Accumulator蝕咗幾十萬美金，正所謂有賭未為輸，有機會賺錢梗係要好好把握，田少噚日入市，今次唔使蝕，仲賺到1蚊。
外傳自由黨選舉失利後，富豪閂水喉減少資助，今時唔同往日，一蚊雞都唔可以睇少。田少噚日參加香港電台與民共度時艱節目《升斗之歌》，呢個節目講小市民如何慳家捱過苦日子，港台要求田少體驗基層生活，嘗試用30蚊買一餐餸。
使30蚊買餸有難度
田少最少有幾十億元身家，買架跑車過百萬元，入一次油閒閒哋成千蚊，拎住30蚊卻面露難色，因為太少錢，唔知買到乜，真係有錢都唔識點使。田少話屋企有幾個工人，平時由太太發辦叫工人買餸，佢幾十歲人都未試過行本地街市，只係遊埠時行market觀光，因此噚日處女入市，揸住30蚊好閉翳。
對於分分鐘幾廿萬上落嘅富豪而言，得30蚊使確係有難度，不過田少轉數快，一入到堅尼地城街市就問販商教路，販商都係仗義之輩，好多人同佢講30蚊買餐餸其實幾好使，田少聽到先冇咁騰雞。田少收完料，先去買咗4蚊豆腐，再買3蚊白菜仔，整白菜豆腐湯。
之後佢買5蚊魚肉同6蚊豬肉，再買6蚊菜，總共花咗24蚊，有錢剩，佢去生果檔睇睇，一睇，原來四個橙賣10蚊，四個蘋果賣10蚊，田少講價，要求2.5元買一個，老闆好順得人，田少用5蚊就買咗個橙同蘋果。
埋單計數，田少只係用29蚊就買到一餐餸，三餸一湯，連飯後果都買埋，仲有錢剩，賺到一蚊打斧頭錢，佢十分滿意收穫，「原來30蚊買到咁多嘢！」佢又指幾十蚊買餐餸只可以求飽肚，「幾蚊買嚿豬肉，同300蚊買塊豬扒，梗係有唔同。」
另一個玩買餸嘉賓係工聯會鄭耀棠，佢要用30蚊買可以食足三餐嘅餸，棠哥出身基層，平時都有陪太太行街市，慳家完全無難度，所以未開始買餸前，已經牙擦擦咁話贏硬田少，結果買齊魚、肉、菜都只係使咗28蚊，打斧頭功力叻過田少。
mailto:[email protected]