一位中大學生來電郵問左丁山對中大「拆卸烽火台」一事之意見。於是問吓中大新鮮人學生Y，問佢與同學如何討論。學生Y話同學之間討論不多，但佢自己就睇過一啲學生會同學嘅文字，覺得拆烽火台類似拆天星碼頭，毀掉集體回憶，要反對。但中大冇話拆「天星」吖，只係在建築地底圖書館期間，將烽火台搬開，保存，一年後就搬回原址，劉校長（見電視台新聞報導）仲保證：「一寸不會少」㖭。
學生Y話：「唔知噃，校長有講過咩？」原來佢只係睇《蘋果日報》嘅報導，掌握資料不足。咁啱學生Y嘅爸爸與伯父都係工程師，以前參與過地下鐵路嘅建築工程，挖過地洞，清楚了解（一）挖開地面向下掘與（二）挖地洞，不影響地面而向下掘兩者之分別。後者嘅工程費用係比前者貴好多嘅，而且速度慢啲，複雜好多，工程費用當然完全唔同啦。左丁山叫學生Y與父親討論吓，當係一課通識教育。
左丁山認為擴建中大圖書館以應付二○一二年三改四之需要，有其逼切性。同時，中大烽火台係中大學運之象徵，朱銘雕塑「門」係外來訪客必到之地，已成為朱銘嘅傳世代表作，任何一位中大校長都唔敢拆咗佢。為咗得到平衡，建築/工程師諗盡辦法，先將烽火台一磚一石用數碼拍照、標籤，拆後保存妥當，工程完成後在原址豎立，係一個可以接受嘅妥協。如果樣樣都話唔得，絕無妥協餘地嘅話，就好似將中大校圈「冰鮮保存」，完全唔可以發展。
今日之建設，係為咗明日之學生，二○一二年會係學生Y細佬（如果佢考到嘅話）入中大之年，到時學生Y或已畢業離校，畢業之時仍然可在烽火台影相，而佢弟弟就有新嘅擴大圖書館可用，學生Y與同學有何損失呀？諗唔到。中大校友有何損失呀？諗唔到，除非校友日日返中大到烽火台一行，有一年時間見唔到就覺得心理唔安樂。「拆卸烽火台」與「暫時遷移烽火台」有好大分別，一啲報紙係要講「拆中大烽火台」，實在係曲解。