金融海嘯下，汽車業所受的打擊唔細，好多車行都改以觀望態度，唔敢貿貿然入貨，免得變蟹貨，但凡事總有例外，好似Honda就逆市推出首批全新Jazz1.3EX版，唔使兩個星期，已經去咗300部車，今日Honda再接再厲，引入平版LX型號，平凡中見性格，係新一代嘅平民爵士。
記者：梁美甜
攝影：周旭文
模特兒：Ayu
直版LX玩味減
代理早排引入全新一代Jazz1.3EX豪版型號，逆市大賣；經濟持續低迷，代理就引入直版Jazz1.3LX型號，畀車迷多一個經濟選擇。新Jazz最大賣點絕對係佢個巨型天幕天窗，無論係直版LX型號抑或係豪版EX型號都保留呢個裝配，車身同樣搭配1.3公升i-VTEC環保引擎連五前速波箱，副偈一樣，之不過叫得做直版，即係無咁多豪華配備，外形上最為明顯，好似全車大包圍及車尾擾流器、鬼面罩鍍鋁邊飾、霧燈及LED燈尾燈，就連輪胎都由16吋換作15吋。
內裝方面最顯著嘅改動係中控及方向盤，手枕、真皮軚環連音響控制系統等等，尤其係省卻咗軚環加減撥片，操控玩味大減，當日上斜坡時更被EX版推住行！但，話晒新一代Jazz無論車長及軸距都較上一代長咗，重量又增加少少，配以i-VTEC偈，未到2,000轉已經好夠力水，就算以D波加速，反應亦算直接，谷到轉數上到頂差不多達6,000轉都唔算辛苦，真係唔似單Cam風格，相輔相成，入彎表現穩定，操控性唔錯。
車價約平萬五、六
LX版本外形上無EX版般Sporty，反而多添一份簡約清純，輪胎細咗相對地慳番唔少油，加上Jazz自推出以來，素以實用慳油見稱，LX版本咪就係慳上慳，一字排檔操控簡單易記，日常代步絕無難度，只係好玩度及操控性當然無EX版本嘅五前速波箱連軚環加減撥片來得盡興，想幾時拖波就幾時，想要就有，唔似得自動波般等佢自動調節，話番轉頭，𠵱家十居其九私家車車主都係一波走天涯，直版係就係無咁啲BodyKit及豪華配備等，但引擎容積相當，無損Jazz素來討人歡喜嘅實用慳油功能及形象。
LX同EX版本由於裝備有所不同，價錢當然有分別喇，以上一代為例，EX版本比LX版本約貴萬四蚊左右，新一代Jazz由於日圓高企，車價亦較之略為貴一些，全新Jazz1.3EX現時售價為$149,880，估計LX版售價都係平萬四蚊左右，即十三萬五、六千左右吧！
好多人都話有BodyKit大包圍嘅EX版靚仔又好睇，之不過，呢個世界有所謂各花入各眼，最緊要係自己鍾唔鍾意，經濟負唔負擔得來啫。
Profile
引擎：1,339cc直四i-VTEC
馬力：100ps/6,000rpm
扭力：13.0kgm/4,800rpm
傳動：五前速自動波箱
售價：未定（約$136,000）
查詢：合群汽車（23802231）