香港的出生率一向偏低，廣告又話養一個小孩要四百萬，仲點敢應民望插水者的呼籲生三個？但人算不如天算，有人一次生三個！鬧三胞，身邊朋友猛話好彩，父母開心乘三倍之餘，辛苦都乘三倍。走訪兩個三胞胎家庭，媽媽不約而同話「勞身」同「勞心」。
記者：林佩婷
攝影：王文忠
鳴謝：雙胞會（23171108）
勞身幼童篇
羅太（Angela）的三胞胎現時兩歲半，看來精靈活潑，原來出世時只有兩磅，還瞓足個半月醫院。「初懷孕時無諗到生三胞胎，聽到後個腦一片空白！驚自己湊唔掂，經濟上問題亦要考慮。醫生建議話可流產一至兩個令個胞陀得更穩，但我唔想抹煞小朋友嘅生存機會，所以堅持要晒三個。」
兩磅七星仔
要晒三個，問題也乘三。「陀到五、六個月，個肚超級大，腰自然好難負荷，連對腳亦因為負荷太大好痛。又唔知點解嗰陣好鍾意食甜品，狂食之下肥咗40磅。」雖然照顧十足，Angela還是七個月便作動。「可能三個互搶營養，每個出世只兩磅，跟住入箱瞓醫院。見佢哋插晒喉，又要吊奶又唔識自己呼吸，個心好痛！前後差唔多個半月，我日日喊住探佢哋，幾驚自己抑鬱。好彩都等到佢哋五磅幾出院。」
連鎖反應停不了
始終未足月，三兄弟的身體較弱，Angela話最辛苦就是餵奶。「佢哋太細個，喉嚨易敏感。每次餵奶無幾耐就全部嘔番晒出嚟，自己加埋工人都湊唔掂，仲要媽咪過嚟住埋幫手，一個照顧一個。最辛苦係當一個病，跟住三個一齊病，就連少少感冒都要搞好耐。」
到三個會行會走，辛苦更即時升級。「𠵱家兩歲半，正正係最百厭階段，每日喺屋企跳嚟跳去，大孖同細孖兩個唔知係咪同卵相生，成日一齊行動搞搞震。當兩個一起哄，相對斯文的中孖又跟埋一份，我成日驚佢哋容易有意外。」停不了的作戰，真只有當事人才明白。
勞心成長篇
話湊三胞是勞身的話，葉太話教育小朋友就是勞心。年紀稍大的三胞家庭，Joule、Oscar同Jessie已經11歲，下年升中一，葉太話由細到大最擔心他們的性格及教育問題。「唔知係咪三個喺肚度互搶營養，我覺得佢哋轉數唔夠其他小朋友快，咩都慢啲。」三姊弟整日一起，雖有伴不怕悶，但葉太卻說有好有壞。「佢哋成日覺得有事有人幫手，容易造成依賴心理，對世事無咩好奇心，觸覺唔敏銳，又難集中精神，讀書成績自然唔算標青，呢樣係我最擔心。」
（左至右）細妹Jessie性格最獨立；反而大女Joule最難搞，性格內向；二哥Oscar中立派最易相處。
同班易管教
幼稚園開始至小學，他們有時不會同一班級，令葉太非常煩惱。「幼稚園多數玩樂學習，唔同班無問題。但小學開始，三班進度唔一樣，淨係點幫各人溫習已傷腦筋。每個寫嘅手冊都漏咁啲，成日拎錯令我好煩惱。終於到三年級我就同學校提議編埋一班，情況就好好多，起碼要默書測驗可一齊溫、唔小心寫漏手冊都有其他對照番……總之，希望佢哋將來會成熟啲。」小時勞身大時勞心，若說父母長憂99，乘3的威力是羅、葉二太怕且要憂到297歲！