鄧麗欣（Stephy）、側田、楊愛瑾、ILOVEUBOYZ同導演葉念琛，噚日出席電影《保持愛你》喺荃灣舉行嘅開鏡儀式，今次鄧麗欣飛起方力申，同側田扮情侶，講到同側田有冇親熱鏡頭時，Stephy笑住話：「要睇劇情需要，不過如果側田主動要求嘅話都OK，難得佢肯奉獻咁多時間去拍戲，但係側田上次同Kary拍完親熱戲之後嚇怕咗。」Stephy今次只演5日戲，酬勞仲要打折，不過佢都話好滿意喎。
雖然Stephy同側田企埋一齊，明顯女高男矮，不過側田話：「我唔介意，有邊個係會矮過我先？我以前好多女朋友都高過我，𠵱家有冇？我唔講呢啲。」問到佢驚唔驚同Stephy傳緋聞，側田猛話好，仲笑方力申絕對唔係佢嘅對手，不過當佢知道葉念琛亦曾同Stephy傳緋聞後，佢就話：「有咩？仲諗住叫佢加啲親熱戲畀我㖭！𠵱家唔得啦，佢咁勁，我仲未收到劇本，或者我都會問吓有冇親熱戲，但係我對Stephy嘅感覺似阿妹多過係女神。」
周秀娜晒性感
噚日一身性感打扮現身嘅諸葛梓岐，話唔覺得性感打扮搶風頭，佢話：「我今次嘅角色比較男仔頭，所以應該冇性感演出，我屋企又比較傳統，kiss同攬攬已經係極限。」
另外，Stephy與Kary合作嘅電影《絕代雙嬌》喺今個月22號舉行優先場，到時Stephy與Kary喬裝成觀眾，入場睇吓觀眾嘅反應。有「翻版樂基兒」之稱嘅周秀娜，喺戲入面有性感演出，其中一場着金色三點式演出仲好似凸點㖭。
