近期中央雖然頻頻出招救市，但俾佢一手隊冧嘅樓市，似乎已經有啲虛不受補，市場唔單止繼續講發展商劈價賣樓，仲吹埋會停工唔起樓，好似成年前帶頭減價嘅萬科地產，有乜風吹草動零舍惹人注意。今個月初已有內地傳媒講緊萬科旗下有樓盤停工，仲越講越誇，話佢哋喺京滬深等多個城市都有地盤停工咁話。
但講咗成大半個月，萬科日前先以公司執行副總裁肖莉名義，出咗份回應極力否認停工問題。
肖總首先唔認上海萬科城花新園項目停工，話個盤規劃都未做好，何來停工呢？萬科唔存在因為資金不足而停工問題，公司早講過會按市況調整開工量，但承認有啲未賣樓嘅項目就推遲動工；不過所有已開賣嘅樓盤，都有開工。
僅按市況推遲動工
肖總又話萬科現樓貨尾其實唔多，截至第三季，公司總存貨價值874億蚊人仔；現樓貨尾大約50.1億，只佔5.7%，一啲都唔算高喎。