陸續有大企業表示唔會裁員，部份更強調依然照發雙糧花紅，甚至加人工。在目前人心虛怯的市道下，有關大企業的做法可算係一種「良心」表現。強調不裁員的大企業以幾家大地產商最令市場矚目，但若然論「驚喜」度，則似乎非國泰航空（293）莫屬。
事關國泰中期錄得6.63億元虧損後，本月初曾發出過第二次盈警，表示燃油對冲合約虧損高達28億元，預料今年全年業績或將「見紅」。惟咁情況下，國泰仍宣佈明年香港員工可獲平均2%加薪，並派發半個月花紅或8000元特別酬金，以較高者為準。航空業及公司本身還處嚴峻時期，都肯做到咁，都無得再苛求咯!
雙重打擊 苦無對策
近年油價高企，全球航空公司已嗌晒救命，雖然油價由高位回落不少，但衰在又碰上更難搞的金融海嘯，令航空業的不明朗因素一波剛平，一波又起。究竟高油價及金融海嘯那一樣對航空股打擊較大？似乎應該係後者較嚴重，事關燃油附加費應可抵銷部份高油價成本，但後者卻苦無對策。
國泰10月份載客量雖升2.6%，但載客率跌5.3%至75.5%；年尾雖係旅遊旺季，但今年港人留港消費料增，估計國泰股價後市仍要尋底，或會考驗01年低位6元水平。
方星俠