立法會調查雷曼事件小組開工在即，兩大黨都積極準備做齣好戲，好多人關心調查內容能否保密，民主黨主席何俊仁坦言好難確保冇人洩密，更以民主黨都經常被洩密為例，根本冇可能完全防止有人爆料，不過佢強調加入雷曼小組嘅民主黨議員一定會守規矩，唔會做大口仔。民主黨與前綫合併在望，何俊仁話唔會增加多一個副主席，因為會令人覺得係為卿姐度身訂做，好難睇。
民記調撥人手同資源
民建聯方面，黨團召集人葉國謙透露已向加入小組議員落指示，必須落足心機、時間睇文件同開會，唔好空槍上陣以為可以打天才波，黨中央更決定調撥人手同資源，協助議員應付聆訊同處理苦主個案，因為單靠議員同少數助理，肯定搞唔掂，不過佢話唔會考慮增聘職員，事關個黨冇咁多錢，唔似得政府咁，有成個庫房泵水救市。
據葉國謙講，陳鑑林稍後會同雷曼小組內建制派議員傾傾大家如何分工，以更有效率進行聆訊。反對用特權法調查雷曼事件嘅葉劉噚日澄清，佢只係建議調高直選議員實報實銷津貼上限。八方認為呢個建議可以考慮，之不過功能組別議員雖然係小圈子議員，但始終係選舉產生，被視為次等議員，條氣又點順呀！