唔少醫管局高層離任後都熱心醫療工作，醫管局前專業及公共事務總監高永文醫生，就係香港防癌會主席，最新投入服務嘅賽馬會癌症康復中心，更邀得醫管局東區醫院前行政總監梁明娟醫生做中心總監。
梁醫生1967年畢業於香港大學，係婦產科專科醫生，93年東區尤德夫人那打素醫院啓用，佢做「開荒牛」任行政總監，後來又做埋港島東醫院聯網總監。在任期間，梁醫生以「技術轉移」、「病人轉移」及「資料轉移」原則，引進多項公私營合作措施，將不必要嘅入院人數減少7%，奪得醫管局傑出團體獎。
工作咁有成績，梁醫生退休前係醫管局第四位最高薪職員，年薪高達351萬元，其中29萬元係花紅。梁醫生05年退休，今年出山，義務擔任賽馬會癌症康復中心醫務總監，佢話成立一間醫療機構唔容易，以接生比喻，十足做婦產科時幫人接生咁，十幾年前東區醫院「順產」，仲湊到大，希望癌症康復中心都可以「快高長大」，造福更多病人。