法律面前，人人平等，原來喺金融海嘯前，都係人人平等。終審法院首席法官李國能，噚日出席大律師公會獎學金頒獎禮時話，金融海嘯影響各行各業，連法律界都唔例外，而且惡果已經浮現。
李官指由於經濟活動減少，商業性嘅法律需求自然相對少咗，即係話律師少咗生意做，不過，一個銀仔有兩面，另一方面，經濟唔好嘅時候，李官話法院工作量都會隨之增加，因為多咗公司清盤個案要處理，商業糾紛亦多咗，有官司打，即係律師有生意啦。
至於呢兩種情況可唔可以對冲，李官學似四叔話齋，𠵱家好難講，睇唔通，相信要再觀察經濟環境先知道，即係叫法律界人士要做足心理準備啦。