韓片《我老婆係大佬》女星申恩慶，噚日喺控告前夫金政秀偽造文件借貸後首度公開露面，宣傳佢嗰齣講述母愛嘅新劇《白色謊言》。瘦咗唔少嘅申恩慶穿上性感魚網絲襪現身，仲自爆佢4歲囝囝喺出世10個月左右被診斷患上腦積水，佢話好內疚成日要拍戲搵食而好少時間照顧囝囝，但亦希望自己嘅經歷有助演出，引起觀眾共鳴。